سعودی وزیرِ دفاع خالد بن سلمان کی ابوظبی میں اماراتی صدر اور نائب صدر سے ملاقاتیں، علاقائی صورتحال پر گفتگو

دبئی: سعودی وزیرِ دفاع شہزادہ خالد بن سلمان نے اتوار کو متحدہ عرب امارات کے دارالحکومت ابوظبی میں اماراتی صدر شیخ محمد بن زاید آل نہیان سے ملاقات کی، جس میں خطے کی تازہ صورتحال پر تبادلہ خیال کیا گیا۔

اماراتی سرکاری خبر ایجنسی وام کے مطابق دونوں جانب سے علاقائی پیش رفت پر خیالات کا تبادلہ کیا گیا، جس کا مقصد خطے میں سلامتی اور استحکام کو مضبوط بنانا اور پائیدار امن کا حصول تھا۔

شہزادہ خالد بن سلمان نے سماجی رابطے کی ویب سائٹ ایکس پر اپنے پیغام میں کہا کہ ملاقات میں دونوں برادر ممالک کے گہرے اور تاریخی تعلقات کی اہمیت کا اعادہ کیا گیا۔ ان کے مطابق علاقائی صورتحال میں ہونے والی پیش رفت اور تعاون بڑھانے کے طریقوں کے ساتھ ساتھ مشترکہ خلیجی اقدامات پر بھی بات ہوئی۔

عرب نیوز کے مطابق سعودی وزیرِ دفاع نے یہ بھی بتایا کہ انہوں نے ملاقات کے دوران سعودی قیادت کی جانب سے اماراتی صدر کو نیک تمنائیں پہنچائیں۔

شہزادہ خالد بن سلمان نے اماراتی نائب صدر شیخ منصور بن زاید آل نہیان سے بھی ملاقات کی۔ انہوں نے بتایا کہ اس ملاقات میں مشترکہ دلچسپی کے امور پر مسلسل رابطے اور مشاورت کی اہمیت پر زور دیا گیا، اور علاقائی و بین الاقوامی سلامتی و استحکام کو مستحکم کرنے کی کوششوں کی حمایت کے طریقوں پر بات ہوئی۔

انادولو ایجنسی کے مطابق یہ ملاقاتیں ایسے وقت میں ہوئی ہیں جب مشرقِ وسطیٰ میں ایران جنگ کے باعث کشیدگی برقرار ہے اور یمن میں لڑائی دوبارہ شروع ہو چکی ہے، جہاں حوثی باغیوں نے سعودی توانائی اور ہوابازی کی تنصیبات، بشمول ہوائی اڈوں، کو نشانہ بنایا ہے۔

سعودی عرب 2015 سے حوثیوں کے خلاف عرب اتحاد کی قیادت کر رہا ہے۔ حوثیوں نے 2014 میں یمنی دارالحکومت صنعا اور دیگر علاقوں کا کنٹرول سنبھال لیا تھا۔ انادولو کے مطابق متحدہ عرب امارات 2020 میں یمن سے باضابطہ طور پر دستبردار ہو گیا تھا، جبکہ دسمبر 2025 میں اس نے وہاں اپنی باقی ماندہ فوجی موجودگی ختم کرنے کا اعلان کیا۔