ٹرمپ کا ایران جنگ جلد ختم ہونے کا دعویٰ، روسی ڈیزل کا ٹینکر امریکا روانہ

واشنگٹن: امریکی صدر ڈونلڈ ٹرمپ نے فلوریڈا روانگی سے قبل میڈیا سے گفتگو میں کہا ہے کہ امریکا ایران جنگ بہت جلد ختم کر سکتا ہے۔ غیر ملکی خبر رساں ادارے کے مطابق انہوں نے یوکرین میں سٹارلنک کی رسائی میں کسی مسئلے کی صورت میں اسے حل کرانے کی یقین دہانی بھی کرائی۔

دوسری جانب ٹرمپ اور روسی صدر ولادیمیر پیوٹن کے درمیان معاہدے کے بعد روسی ڈیزل کا پہلا ٹینکر امریکا روانہ ہو گیا ہے۔ کریملن نے اس جہاز کی روانگی کی تصدیق کی ہے۔

رپورٹ کے مطابق روس نے 2 لاکھ 98 ہزار بیرل ڈیزل امریکا بھیجا ہے، جو 7 نومبر کو نیویارک پہنچ سکتا ہے۔ یہ جہاز روسی بندرگاہ پرائمورسک سے روانہ ہوا ہے۔

غیر ملکی خبر رساں ادارے کے مطابق ٹرمپ انتظامیہ نے عالمی منڈی میں روسی ڈیزل کی رسد بڑھانے کے لیے پابندیوں میں نرمی کی ہے۔ امریکا میں روزانہ ڈیزل کی کھپت 38 لاکھ بیرل ہے، اس لیے روسی کھیپ امریکی ضرورت کا ایک دن بھی پورا نہیں کر سکے گی اور قیمتوں پر اس کے محدود اثرات مرتب ہونے کا امکان ہے۔

میڈیا رپورٹس کے مطابق امریکا میں رواں سال ڈیزل کی قیمتوں میں 78 فیصد اضافہ ریکارڈ کیا گیا ہے، جبکہ تقریباً ساڑھے چار سال بعد روسی ڈیزل کی امریکا کو برآمدات بحال ہونے جا رہی ہیں۔ امریکا نے اپریل 2022 میں روسی تیل اور پیٹرولیم مصنوعات کی درآمد پر پابندی عائد کی تھی۔