قومی اسمبلی: تین نئے بل کمیٹیوں کے سپرد، تین ترمیمی بل منظور، اجلاس جمعرات تک ملتوی

اسلام آباد: قومی اسمبلی میں قانون سازی کے دوران تین نئے بل متعلقہ قائمہ کمیٹیوں کے سپرد کر دیے گئے، جبکہ تین ترمیمی بل منظور کر لیے گئے۔ اجلاس جمعرات تک ملتوی کر دیا گیا۔

بلال اظہر کیانی نے کمپنیات ترمیمی بل پیش کیا، جبکہ عقیل ملک نے صنعتی تعلقات ترمیمی بل اور امیگریشن ترمیمی بل ایوان میں پیش کیے۔ تینوں بل مزید غور اور جائزے کے لیے متعلقہ قائمہ کمیٹیوں کے سپرد کر دیے گئے۔

اجلاس میں محفوظ شدہ دستاویزاتی مواد تحفظ و برآمدی کنٹرول ترمیمی بل، متروکہ املاک انتظام و انصرام ترمیمی بل اور مراکز فضیلت ترمیمی بل بھی منظور کر لیے گئے۔

اپوزیشن لیڈر کا خطاب

اپوزیشن لیڈر محمود خان اچکزئی نے کہا کہ ایک صوبے کی پارلیمنٹ پر حملہ کیا گیا اور حق رائے دہی کا مذاق اڑایا گیا ہے۔

انہوں نے دعویٰ کیا کہ چھ، سات یا آٹھ ارکان قومی اسمبلی لاپتا ہیں اور سوال اٹھایا کہ خیبرپختونخوا کے وزیراعلیٰ کہاں ہیں اور آیا وہ زندہ ہیں۔

اسپیکر کو مخاطب کرتے ہوئے انہوں نے کہا کہ آپ ایوان کے کسٹوڈین ہیں، ارکان کے پروڈکشن آرڈرز جاری کرنا اور ان کے تحفظ کو یقینی بنانا آپ کی ذمہ داری ہے۔

انہوں نے فرانس میں مہنگائی کے خلاف مظاہروں کا حوالہ دیتے ہوئے کہا کہ وہاں لاکھوں افراد سڑکوں پر نکلے، لیکن ابھی تک ایک گولی نہیں چلی۔ بعد ازاں اجلاس جمعرات تک ملتوی کر دیا گیا۔