بلال یاسین کا راولپنڈی میں اپنی چھت اپنا گھر منصوبے اور چہان ڈیم واٹر سپلائی منصوبے کا دورہ

لاہور: وزیر اعلیٰ پنجاب مریم نواز شریف کی ہدایت پر صوبائی وزیر ہاؤسنگ اینڈ اربن ڈویلپمنٹ بلال یاسین نے راولپنڈی کا دورہ کیا، جہاں انہوں نے اپنی چھت، اپنا گھر پروگرام کے تحت تعمیر ہونے والے گھروں کا معائنہ کیا اور جاری تعمیراتی سرگرمیوں کا جائزہ لیا۔

بلال یاسین نے کہا کہ متوسط طبقے کو اپنا گھر فراہم کرنا حکومت پنجاب کی ترجیحات میں شامل ہے۔ حکومت پنجاب کے تعاون سے شہری اپنے گھروں کے مالک بن رہے ہیں اور یہ پروگرام عوام کو باعزت رہائش کی سہولت فراہم کرنے میں اہم کردار ادا کر رہا ہے۔

انہوں نے بتایا کہ پروگرام کے تحت اب تک 2 لاکھ 17 ہزار 520 گھرانوں کو مالی معاونت فراہم کی جا چکی ہے، جبکہ 1 لاکھ 26 ہزار 239 گھر مکمل ہو چکے ہیں۔

چہان ڈیم واٹر سپلائی منصوبہ

صوبائی وزیر نے چہان ڈیم واٹر سپلائی منصوبے کا بھی دورہ کیا اور فلٹریشن پلانٹ کی تعمیراتی پیش رفت کا جائزہ لیا۔ انہوں نے کہا کہ یہ منصوبہ راولپنڈی کے شہریوں کے لیے وزیراعلیٰ پنجاب مریم نواز شریف کا تحفہ ہے۔ تکمیل سے راولپنڈی کے متعدد علاقوں کو صاف پانی کی فراہمی ممکن ہو سکے گی۔

بلال یاسین کے مطابق چہان ڈیم واٹر ٹریٹمنٹ پلانٹ اگلے سال مکمل ہو جائے گا، جس سے ڈھائی لاکھ سے زائد شہری مستفید ہوں گے۔ منصوبے کی تکمیل سے شہریوں کو صاف پانی کی فراہمی میں بہتری آئے گی اور علاقے کے عوام کو بنیادی سہولیات کی فراہمی میں مدد ملے گی۔