حکومت کے پی ٹی آئی کے بعض رہنماؤں سے غیر رسمی رابطے ہیں: رانا ثناء اللہ

اسلام آباد: وزیراعظم کے مشیر برائے سیاسی امور رانا ثناء اللہ نے کہا ہے کہ حکومت کا پاکستان تحریک انصاف (پی ٹی آئی) کے بعض رہنماؤں سے "آف دی ریکارڈ" رابطہ برقرار ہے، تاہم انہوں نے ان کے نام ظاہر نہیں کیے۔

جیو نیوز کے پروگرام "آج شاہزیب خانزادہ کے ساتھ" میں گفتگو کرتے ہوئے انہوں نے بتایا کہ یہ رابطے وقتاً فوقتاً ٹیلیفون پر اور قومی اسمبلی و سینیٹ کے اجلاسوں کے دوران ہوتے رہتے ہیں۔

رانا ثناء اللہ کے مطابق ان "دوستوں" کے نام اس لیے نہیں بتائے جا سکتے کہ اس سے ان کی اپنی جماعت میں ان کی ساکھ کے مسائل پیدا ہو سکتے ہیں۔

انہوں نے کہا کہ بات چیت جب ٹھوس شکل اختیار کر لے گی تو معاملہ باقاعدہ اور آن دی ریکارڈ مذاکرات کی طرف جا سکتا ہے۔

غیر رسمی رابطوں کو رسمی مذاکرات میں بدلنے میں رکاوٹ کے سوال پر انہوں نے مذاکراتی عمل کے حوالے سے پی ٹی آئی کے اندر پائے جانے والے اختلافات کی نشاندہی کی۔

ان کا کہنا تھا کہ پی ٹی آئی کے اجلاسوں میں اس بات پر بحث ہوئی کہ سابقہ مذاکراتی عمل کو "سبوتاژ" کیا گیا۔