دہشت گردی کے خلاف ایک بار پھر قومی اتحاد ضروری ہے: سینیٹ میں رانا ثنا اللہ کا خطاب

اسلام آباد: وزیر اعظم کے سیاسی مشیر رانا ثنا اللہ خان نے کہا ہے کہ دہشت گردی کے معاملے پر پوری قوم کو یکجا ہونا چاہیے۔ ان کے مطابق تمام سیاسی جماعتوں کو اس معاملے پر ایک پیج پر آنا ہوگا اور دہشت گردی سے نمٹنے کے لیے ایک بار پھر قومی اتحاد کی ضرورت ہے۔

منگل کو سینیٹ اجلاس میں نکتہ اعتراض پر رانا ثنا اللہ نے کہا کہ اس وقت سب دہشت گردی کا نشانہ بن رہے ہیں۔

انہوں نے یاد دلایا کہ سانحہ اے پی ایس کے بعد تمام سیاسی جماعتیں یکجا ہوئی تھیں اور ضربِ عضب آپریشن ہوا تھا۔ ان کے مطابق دہشت گردی کے خلاف جنگ میں تمام سیاسی جماعتوں کو متحد ہونا ہوگا۔

اپوزیشن پر تنقید

رانا ثنا اللہ نے اپوزیشن جماعتوں پر تنقید کرتے ہوئے کہا کہ وہ خود وزیراعظم سے ملاقات کے لیے تیار نہیں۔ ان کا الزام تھا کہ اپوزیشن ملاقات کی جگہ اپنی مرضی سے مقرر کرنا چاہتی ہے اور اسپیکر چیمبر میں ملاقات پر بھی تیار نہیں۔

انہوں نے بتایا کہ انہوں نے خود سینیٹ میں اپوزیشن لیڈر سے اسپیکر چیمبر میں ملاقات کی درخواست کی تھی، لیکن اپوزیشن اس پر بھی آمادہ نہیں۔

وزیر اعظم کے سیاسی مشیر نے کہا کہ دہشت گردی کے خلاف پاک فوج کے جوان شہید ہو رہے ہیں جبکہ پی ٹی آئی والے سوشل میڈیا پر ادارے کے سربراہ کے خلاف مہم چلا رہے ہیں۔

ان کا کہنا تھا کہ پی ٹی آئی خود سوشل میڈیا کا شکار ہوئی ہے اور اس نے دہشت گردی کے خلاف آپریشن میں ساتھ دینے سے انکار کیا ہے۔

رانا ثنا اللہ نے پی ٹی آئی والوں سے کہا کہ وہ اپنی حرکتوں پر خود غور کریں، جن میں بیس لاکھ افراد لانے کی باتیں بھی شامل ہیں۔