سہیل آفریدی کا لانگ مارچ ‘شارٹ ٹرم مارچ’ بن گیا، یہ دہشت گرد تنظیموں کے حق میں ہے: عظمیٰ بخاری

لاہور (اعتماد ڈیسک): عظمیٰ بخاری نے کہا ہے کہ وزیراعلیٰ خیبرپختونخوا سہیل آفریدی کا لانگ مارچ ”شارٹ ٹرم مارچ“ بن چکا ہے جو نہ بانی پی ٹی آئی کے حق میں ہے نہ پختون عوام کے، بلکہ دہشت گرد تنظیموں کے حق میں جا رہا ہے۔

اپنے بیان میں انہوں نے کہا کہ خیبرپختونخوا میں ایک طرف دہشت گردی ہو رہی ہے اور دوسری طرف سہیل آفریدی کنٹینر پر چڑھے ہیں؛ پورا صوبہ غیر محفوظ ہے مگر سڑکوں پر دندناتا مارچ مکمل محفوظ ہے۔

عظمیٰ بخاری نے کہا کہ پی ٹی آئی کی سینئر قیادت کو ایک ”کنٹینر باز“ نے یرغمال بنا لیا ہے جو کنٹینر پر کھڑے ہو کر انہی فورسز کا مذاق اڑاتا اور دہشت گردوں کے لیے نرم گوشہ رکھتا ہے، جبکہ سکیورٹی فورسز صوبے کے عوام کے تحفظ کے لیے جانیں قربان کر رہی ہیں۔

ان کا کہنا تھا کہ خیبرپختونخوا دہشت گردی سے سب سے زیادہ متاثرہ صوبہ ہے اور اس کی پولیس اور عوام کی قربانیاں ناقابلِ فراموش ہیں۔ ان کے بقول کے پی کے لوگ خود مطالبہ کر رہے ہیں کہ انہیں پی ٹی آئی اور نالائق ٹولے سے نجات دلائی جائے، اور عوام کے مسترد کرنے کے بعد اے آئی سے ویڈیوز بنا کر سوشل میڈیا پر ڈالی جا رہی ہیں۔