عقیل ملک: امریکا کے ساتھ معدنیات کا کوئی لائسنس نہیں ہوا، مولانا لائسنس سامنے لائیں

اسلام آباد: وزیر مملکت قانون بیرسٹر عقیل ملک نے کہا ہے کہ کے پی میں پی ٹی آئی حکومت اپنی آئینی ذمے داریاں ادا کرنے کو تیار نہیں تھی۔ انہوں نے افسوس کا اظہار کیا کہ جمعیت علما اسلام کی طرف سے الزامات آرہے ہیں۔

میڈیا سے گفتگو میں انہوں نے کہا کہ مولانا اور ان کی جماعت نے کہا کہ ایمرجنسی کا فیصلہ معدنیات کے لیے کیا گیا۔ ان کے مطابق مولانا فضل الرحمان بہت زیرک سیاستدان ہیں اور وہ صوبے کی سیکیورٹی پر عدم اطمینان کا اظہار کر چکے تھے۔

عقیل ملک نے کہا کہ مولانا نے امریکا کا نام بھی لیا کہ انہیں لائسنس دے دیا، مولانا امریکا کے ساتھ معدنیات کا لائسنس سامنے لائیں۔ انہوں نے کہا کہ امریکا یا کسی ملک کے ساتھ کوئی معدنیات کا لائسنس نہیں ہوا، یہ جھوٹ اور من گھڑت بات ہے۔

انہوں نے مولانا کے الزامات کی تردید کرتے ہوئے کہا کہ فروری 2024 تک 3 ہزار 262 مائننگ لائسنس دیے گئے، جبکہ 2024 کے بعد اب تک 4 ہزار 917 لائسنس دیے جا چکے ہیں۔ ان کے بقول یہ لائسنس پی ٹی آئی نے دیے، جس کی 13 سال سے حکومت تھی۔