فخر زمان ایک روزہ کرکٹ میں 4 ہزار رنز مکمل کرنے والے 16ویں پاکستانی بیٹر بن گئے

لاہور: پاکستانی اوپنر فخر زمان نے سری لنکا کے خلاف ٹرائی نیشن سیریز کے فائنل میں سنچری کے ساتھ ایک روزہ کرکٹ میں اپنے 4 ہزار رنز پورے کر لیے ہیں۔

36 سالہ فخر زمان نے صرف 97 میچز میں 4 ہزار رنز بنائے ہیں، جس دوران انہوں نے 12 سنچریاں اور 20 نصف سنچریاں اسکور کیں۔

انہوں نے سری لنکا کے خلاف فائنل میں 84 گیندوں پر سنچری اسکور کی اور 99 گیندوں پر 127 رنز کی شاندار اننگز کھیل کر بولڈ ہوگئے۔ فخر زمان کی یہ چوتھی سنچری ہے جو انہوں نے ہدف کے تعاقب کے دوران اسکور کی ہے۔

پاکستانی بیٹرز کی فہرست

فخر زمان نے 97 میچز کی 96 اننگز میں 4016 رنز بنائے ہیں، وہ پاکستان کی طرف سے یہ سنگ میل عبور کرنے والے 16ویں بیٹر ہیں۔

اس فہرست کے ٹاپ 10 پاکستانی بیٹرز میں انضمام الحق پہلے، محمد یوسف دوسرے، سعید انور تیسرے، شاہد آفریدی چوتھے، شعیب ملک پانچویں، جاوید میانداد چھٹے، یونس خان ساتویں، سلیم ملک آٹھویں، بابر اعظم نویں اور محمد حفیظ دسویں نمبر پر ہیں۔