فیصل آباد: چناب کلب کے باہر سے پجارو چوری، تعاقب کرنے والے بزنس مین میاں ریحان قتل

جڑانوالہ: فیصل آباد میں تھانہ سول لائن کے علاقے چناب کلب کے باہر سے پجارو چوری کرکے فرار ہونے والے نامعلوم ملزمان نے تعاقب کے دوران جڑانوالہ روڈ پر بندو خان کے قریب فائرنگ کرکے جمسا کمپنی کے مالک، معروف بزنس مین میاں ریحان کو قتل کردیا۔

ذرائع کے مطابق میاں ریحان فیملی تقریب میں شرکت کے لیے چناب کلب آئے تھے، جہاں سے ملزمان ان کی پجارو چوری کرکے فرار ہوگئے۔

تعاقب کے دوران ملزمان کی فائرنگ سے گردن پر گولی لگنے کے باعث میاں ریحان موقع پر ہی جاں بحق ہوگئے، جبکہ ملزمان فرار ہونے میں کامیاب ہوگئے۔

پولیس کارروائی

سی پی او فیصل آباد تنویر حسین نے واقعے کا نوٹس لیتے ہوئے ایس پی اقبال ڈویژن سعید احمد سے رپورٹ طلب کرلی ہے۔

ملزمان کی گرفتاری کے لیے پولیس ٹیمیں تشکیل دے دی گئی ہیں، جبکہ پنجاب فرانزک سائنس ایجنسی کی ٹیمیں جائے وقوعہ سے شواہد اکٹھے کر رہی ہیں۔ سی پی او کے مطابق ملزمان کو جلد گرفتار کرکے قانون کے کٹہرے میں لایا جائے گا۔