قائداعظم ٹرافی اور نیشنل ٹی 20 کے میچز کراچی میں ہوں گے: اسامہ شرون نیازی

کراچی: پاکستان کرکٹ بورڈ (پی سی بی) کے ڈائریکٹر ڈومیسٹک کرکٹ آپریشنز اسامہ شرون نیازی نے کہا ہے کہ قائداعظم ٹرافی اور نیشنل ٹی 20 کے میچز کراچی میں منعقد کیے جائیں گے، جبکہ شہر میں ڈومیسٹک کرکٹ کے دیگر ٹورنامنٹس کے انعقاد کے لیے بھی کوششیں کی جائیں گی۔

انہوں نے خبردار کیا کہ پی سی بی کے اجازت نامے کے بغیر منعقد ہونے والے ٹورنامنٹس میں شرکت کرنے والے کھلاڑیوں کے خلاف قواعد کے مطابق سخت کارروائی کی جائے گی۔

ان خیالات کا اظہار انہوں نے کے سی سی اے اسٹیڈیم کے دورے کے موقع پر ریجنل کرکٹ ایسوسی ایشن کراچی کے عہدیداران سے ملاقات کے دوران کیا۔ اجلاس میں شہر میں ڈومیسٹک اور کلب کرکٹ کے فروغ، گراؤنڈز کی دستیابی، ٹورنامنٹس کے انعقاد اور نوجوان کھلاڑیوں کو آگے بڑھنے کے مواقع فراہم کرنے پر تبادلہ خیال کیا گیا۔

نوجوان کھلاڑیوں کے لیے مواقع

اسامہ شرون نیازی نے کہا کہ چیئرمین پی سی بی محسن نقوی کی سرپرستی میں ملک بھر میں کرکٹ کے فروغ اور ترقی کے لیے اقدامات کیے جا رہے ہیں۔ ان کا مقصد نوجوان اور باصلاحیت کھلاڑیوں کو اپنی صلاحیتیں دکھانے کے زیادہ سے زیادہ مواقع فراہم کرنا ہے، تاکہ وہ عمدہ کارکردگی کی بنیاد پر قومی ٹیم میں جگہ بنا سکیں۔

انہوں نے کہا کہ پی سی بی ریجنل کرکٹ ایسوسی ایشنز کی سفارشات پر مختلف ٹورنامنٹس کے لیے اجازت نامے جاری کرتا ہے۔ کلبوں کے ساتھ رجسٹرڈ کھلاڑی صرف بورڈ کے قواعد کے مطابق منعقد ہونے والے مقابلوں میں حصہ لیں، کیونکہ اجازت نامے کے بغیر ہونے والے ٹورنامنٹس میں شرکت پر کارروائی کی جائے گی۔

کراچی کی کرکٹ خدمات کو سراہتے ہوئے انہوں نے کہا کہ اس شہر نے ظہیر عباس، جاوید میانداد، معین خان، راشد لطیف، سرفراز احمد اور اسد شفیق جیسے نامور کھلاڑی قومی کرکٹ کو دیے ہیں، جنہوں نے اپنی کارکردگی سے پاکستان کا نام روشن کیا۔ کراچی میں کرکٹ کے فروغ اور باصلاحیت کھلاڑیوں کی تربیت کے لیے مزید اقدامات کی ضرورت ہے۔

انہوں نے کے سی سی اے اسٹیڈیم کو سراہتے ہوئے کہا کہ ندیم عمر نے اسے بہترین انداز میں تیار کیا ہے اور یہ ملک کے معیاری کرکٹ گراؤنڈز کے ہم پلہ ہے۔

ایسوسی ایشن کے عہدیداران

ریجنل کرکٹ ایسوسی ایشن کراچی کے سیکریٹری علی حسین نے کہا کہ ایسوسی ایشن کرکٹ کے فروغ اور بہتری کے لیے پی سی بی کے ساتھ ہر سطح پر تعاون جاری رکھے گی۔

چیئرمین ٹورنامنٹ کمیٹی خالد نفیس نے کہا کہ کراچی میں گراؤنڈز کی کمی کے باوجود ملک میں سب سے زیادہ کرکٹ اسی شہر میں کھیلی جاتی ہے۔ انہوں نے آر سی اے کراچی کے صدر ندیم عمر کی کاوشوں کو سراہتے ہوئے کہا کہ ان کی کوششوں سے شہر میں کرکٹ سرگرمیاں جاری ہیں اور کھلاڑیوں کو اپنی صلاحیتوں کے اظہار کے مواقع مل رہے ہیں۔

آر سی اے کراچی کے جوائنٹ سیکریٹری محمد توصیف صدیقی نے تجویز دی کہ کلب کرکٹ کے مقابلوں کے لیے الگ وقت مختص کیا جائے، تاکہ کلب اپنی سرگرمیاں بہتر انداز میں منظم کرسکیں اور نوجوان کھلاڑیوں کو زیادہ میچ کھیلنے کے مواقع حاصل ہوں۔

اسامہ شرون نیازی کی آمد پر آر سی اے کراچی کے سیکریٹری علی حسین، خالد نفیس اور محمد توصیف صدیقی سمیت زونل عہدیداران نے ان کا استقبال کیا اور پھولوں کے گلدستے پیش کیے۔ ملاقات میں ایسوسی ایشن کے مختلف عہدیداران نے بھی اپنی تجاویز پیش کیں۔

بعدازاں پی سی بی کے ڈائریکٹر ڈومیسٹک کرکٹ آپریشنز نے کراچی میں کرکٹ کی سہولیات اور گراؤنڈز کی صورت حال کا جائزہ لینے کے لیے نیشنل بینک، یو بی ایل، ٹی ایم سی اور دیگر کرکٹ گراؤنڈز کا دورہ کیا۔ ان کے ہمراہ آر سی اے کراچی کے کوآرڈینیٹر اعظم خان بھی موجود تھے۔ دورے کا مقصد شہر میں کرکٹ سرگرمیوں، گراؤنڈز کی دستیابی اور ڈومیسٹک مقابلوں کے انعقاد کے لیے موجود سہولیات کا جائزہ لینا تھا۔

اسامہ شرون نیازی نے پرتپاک استقبال پر آر سی اے کراچی کے عہدیداران کا شکریہ ادا کرتے ہوئے امید ظاہر کی کہ پی سی بی اور ایسوسی ایشن کے باہمی تعاون سے شہر میں کرکٹ سرگرمیوں کو مزید فروغ ملے گا۔