لانگ مارچ اور دھرنے ختم کریں تو بات چیت کے لیے تیار ہیں: وزیراعظم شہباز شریف کی پی ٹی آئی کو پیشکش

اسلام آباد (اعتماد ڈیسک): وزیراعظم شہباز شریف نے پاکستان تحریک انصاف کو پیشکش کی ہے کہ وہ لانگ مارچ اور دھرنے ختم کرے تو حکومت اس کے ساتھ بیٹھنے کے لیے تیار ہے۔ ان کا کہنا تھا کہ عوام کے جان و مال کی حفاظت حکومت کی ذمہ داری ہے اور قانون اپنا راستہ لے گا۔

اسلام آباد میں کشمیر چوک انڈرپاس کے سنگ بنیاد کی تقریب سے خطاب کرتے ہوئے وزیراعظم نے کہا کہ حکومتی کمیٹی نے اسپیکر چیمبر میں پی ٹی آئی سے 2 دن بات چیت کی اور توقع تھی کہ اس کے بعد دھرنوں کی سیاست کو خیرباد کہا جائے گا، مگر پی ٹی آئی وفد نے طے شدہ امور میں تبدیلی کا مطالبہ کر دیا۔ ان کے بقول پی ٹی آئی کی کوشش تھی کہ بات چیت کسی طرح کامیاب نہ ہو۔

وزیراعظم نے کہا کہ دھرنوں اور لانگ مارچ کی سیاست کا پہلا نشانہ ملکی معیشت بنتی ہے۔ ڈھائی برسوں میں ٹیم ورک سے معیشت کو پاؤں پر کھڑا کیا گیا، ترسیلات زر اور آئی ٹی برآمدات بڑھیں اور دنیا پاکستان کی تعریف پر مجبور ہوئی، لیکن اب ترقی کے پہیے کو جان بوجھ کر جام کیا جا رہا ہے۔

انڈرپاس منصوبے کے حوالے سے وزیراعظم نے کہا کہ سڑکیں، انڈرپاس اور پل عوام کی سفری سہولت کے لیے بنائے جاتے ہیں اور انشاءاللہ ایک دن یہ شاہراہ کشمیر اور سری نگر تک پہنچے گی۔ انہوں نے پی ٹی آئی کو ہوش کے ناخن لینے کا مشورہ دیا اور کہا کہ قوم چاہتی ہے پاکستان محنت، امانت اور دیانت کے ساتھ آگے بڑھے۔