اے بی ڈی ویلیئرز: آنکھ کے پردے کی سرجری نہ ہوتی تو بینائی جا سکتی تھی

جوہانسبرگ: جنوبی افریقا کے سابق کپتان اے بی ڈی ویلیئرز نے انکشاف کیا ہے کہ ڈاکٹروں نے انہیں خبردار کیا تھا کہ دائیں آنکھ کے پردے کے اپنی جگہ سے ہٹ جانے کے باعث وہ بینائی سے محروم ہو سکتے تھے۔

ایک پوڈکاسٹ میں انجری کے ساتھ کرکٹ کھیلنے سے متعلق سوال پر انہوں نے بتایا کہ کچھ عرصہ قبل ان کی آنکھ کی سرجری ہوئی تھی۔ دائیں آنکھ ان کی غالب آنکھ نہیں تھی، اس لیے اس انجری نے کرکٹ پر زیادہ اثر نہیں ڈالا۔

انہوں نے بتایا کہ انڈین پریمیئر لیگ کے دوران خصوصاً رات کے وقت دائیں آنکھ کی بینائی دھندلا جاتی تھی۔ کرکٹ سے ریٹائرمنٹ کے بعد انہوں نے آنکھ کا معائنہ کرایا، کیونکہ وہ کھیلنے کے دنوں میں سرجری نہیں کرانا چاہتے تھے۔

اے بی ڈی ویلیئرز کے مطابق ڈاکٹروں نے معائنے کے دوران آنکھ کے پردے کے اپنی جگہ سے ہٹ جانے کی تشخیص کی اور اگلے ہی روز آپریشن کر دیا۔ ڈاکٹروں نے خبردار کیا تھا کہ وہ اپنی بینائی بھی کھو سکتے تھے۔

دسمبر 2023 میں انہوں نے انکشاف کیا تھا کہ ان کے بیٹے نے غلطی سے اپنی ایڑی ان کی آنکھ پر مار دی تھی اور وہ اپنے کیریئر کے آخری دو سال آنکھ کے پردے کی اس تکلیف کے ساتھ کھیلتے رہے۔