اسحاق ڈار کا مولانا فضل الرحمان کو فون، اپوزیشن سے رابطوں کی آخری کوشش کا فیصلہ

اسلام آباد (اعتماد ڈیسک): وفاقی حکومت نے خیبرپختونخوا سے متعلق کسی حتمی فیصلے سے قبل مولانا فضل الرحمان کے ذریعے اپوزیشن سے رابطوں کی آخری کوشش کرنے کا فیصلہ کیا ہے اور نائب وزیراعظم اسحاق ڈار نے کابینہ اجلاس کے دوران ہی مولانا سے ٹیلی فون پر بات کی۔

وفاقی کابینہ کے اجلاس میں یہ تجویز سامنے آئی کہ آخری فیصلے سے پہلے مولانا فضل الرحمان کو درمیان میں لایا جائے۔ ٹیلی فونک گفتگو میں خیبرپختونخوا حکومت پر زور دیا گیا کہ وہ دہشت گردی کے خلاف وفاقی حکومت کا ساتھ دے۔

اس رابطے کے بعد مولانا فضل الرحمان نے پی ٹی آئی رہنما اسد قیصر سے دوبارہ ٹیلی فون پر بات کی اور انہیں حکومت سے بات چیت کی تفصیلات سے آگاہ کیا۔ توقع ہے کہ مولانا شام کو پریس کانفرنس میں سیاسی رابطوں کی صورتحال بیان کریں گے۔

اس سے قبل مولانا فضل الرحمان اپنے پیغام میں کہہ چکے ہیں کہ مذاکرات کے معاملات مثبت سمت میں بڑھ رہے ہیں، تاہم اگر ایمرجنسی لگائی گئی تو جے یو آئی اس کی مخالفت میں آخری حد تک جائے گی۔