وزیراعظم کا دانش سکولوں کی تعمیر میں تیزی اور معیار پر سمجھوتہ نہ کرنے کا حکم

لاہور: وزیراعظم شہباز شریف نے ملک بھر میں دانش سکولوں کی تعمیر کی رفتار بڑھانے اور وقت پر تکمیل کے لیے دن رات کام کرنے کی ہدایت کی ہے۔ انہوں نے واضح کیا کہ ان اداروں کے معیار پر کوئی سمجھوتہ قبول نہیں کیا جائے گا۔

وزیراعظم ہفتے کے روز لاہور سے زوم کے ذریعے ہونے والے آن لائن جائزہ اجلاس کی صدارت کر رہے تھے۔ اجلاس میں گلگت بلتستان، آزاد جموں و کشمیر، سندھ اور بلوچستان میں دانش سکولوں کی تعمیر کی پیش رفت پر بریفنگ دی گئی۔

اجلاس میں وفاقی وزرا احسن اقبال، احد خان چیمہ، عطا اللہ تارڑ، شزا فاطمہ خواجہ اور ڈاکٹر مصدق مسعود ملک کے علاوہ متعلقہ محکموں اور اداروں کے سینئر حکام شریک تھے۔

شہباز شریف نے کہا کہ بچے ملک کا مستقبل ہیں اور دانش سکول روشن مستقبل میں سرمایہ کاری ہیں۔ ان کے مطابق ان سکولوں میں انتہائی غریب اور مستحق خاندانوں کے بچوں کو سختی سے میرٹ پر داخلہ دیا جائے گا تاکہ مالی حالات باصلاحیت طلبہ کی راہ میں رکاوٹ نہ بنیں۔

وزیراعظم نے طلبہ کی تعلیم و تربیت کے لیے مصنوعی ذہانت اور انفارمیشن ٹیکنالوجی پر مبنی جدید طریقے اپنانے کی ہدایت کی۔ انہوں نے سکولوں کے انفراسٹرکچر، سہولیات اور خدمات کے معیار کی جانچ کے لیے تھرڈ پارٹی validation کا بھی حکم دیا۔

وزارتِ مواصلات کو گلگت بلتستان اور آزاد کشمیر میں دانش سکولوں تک آسان رسائی کے لیے مؤثر سڑکوں کا نیٹ ورک قائم کرنے کی ہدایت کی گئی۔ خیبرپختونخوا کے ضم شدہ اضلاع (سابق فاٹا) میں دانش سکول قائم کرنے کی حکمت عملی بھی جلد پیش کرنے کا حکم دیا گیا۔