کوئٹہ: انٹرنیشنل باکسنگ چیمپئن شپ اختتام پذیر، نجیب اللہ نے گولڈ میڈل جیت لیا

کوئٹہ: ایوب اسٹیڈیم کوئٹہ میں پاکستان پروفیشنل باکسنگ ایسوسی ایشن کے زیر اہتمام مرحوم عبدالغنی مینگل میموریل انٹرنیشنل باکسنگ چیمپئن شپ 2026 اختتام پذیر ہو گئی۔ اختتامی تقریب کے مہمان خصوصی گورنر بلوچستان جعفر خان مندوخیل تھے۔

چیمپئن شپ میں پاکستان، افغانستان اور ایران سے تعلق رکھنے والے 60 باکسرز نے حصہ لیا۔ فائنل مقابلوں میں چار باکسرز نے کامیابی حاصل کی، جبکہ پاکستان کے گولڈ باکسر نجیب اللہ نے گولڈ میڈل اپنے نام کیا۔ علی احمد اور ایران کے دانیال شاہ نے بھی نمایاں کارکردگی دکھائی۔ پاکستانی خاتون باکسر بس بانو نے بھی اپنی صلاحیتوں کا بھرپور مظاہرہ کیا اور شائقین کی توجہ حاصل کی۔

تقریب میں صوبائی وزیر میر عاصم کرد گیلو، نوراللہ لہڑی، کھیلوں سے وابستہ شخصیات، منتظمین اور شائقین نے شرکت کی۔

گورنر بلوچستان جعفر خان مندوخیل نے خطاب کرتے ہوئے کہا کہ پاکستان کو متعدد کھیلوں میں عالمی سطح پر نمایاں کامیابیاں حاصل رہی ہیں، اور بلوچستان کے نوجوانوں میں بھی بے پناہ صلاحیتیں موجود ہیں۔ ان کے مطابق ضرورت اس بات کی ہے کہ انہیں اپنی صلاحیتوں کے اظہار کے لیے مناسب مواقع اور جدید سہولیات فراہم کی جائیں۔

انہوں نے کہا کہ کھیلوں کے شعبے کے لیے خاطر خواہ فنڈز مختص کیے گئے ہیں، جن کے مؤثر استعمال کو یقینی بنایا جائے گا تاکہ کھلاڑیوں کی تربیت، ترقی اور بین الاقوامی مقابلوں میں نمائندگی کے مواقع بڑھائے جا سکیں۔