ایس ای سی پی کا ایس ای فروٹس اینڈ ویجیٹیبل کے آئی پی او کی تحقیقات کا حکم

کراچی: سیکیورٹیز اینڈ ایکسچینج کمیشن آف پاکستان (ایس ای سی پی) نے ایس ای فروٹس اینڈ ویجیٹیبل لمیٹڈ کے حصص کی ابتدائی عوامی پیشکش (آئی پی او) میں معلومات کی فراہمی کی درستگی اور تکمیل سے متعلق تحقیقات شروع کر دی ہیں۔

انکوائری کا مقصد ممکنہ غفلت، خامیوں اور نااہلی کی نشاندہی کرتے ہوئے ذمہ دار فریقین کا تعین کرنا ہے۔

تحقیقات کا دائرہ کار

ایس ای سی پی کے مطابق تحقیقات میں پاکستان اسٹاک ایکسچینج کے بطور متعلقہ نگران ادارے کردار، کنسلٹنٹ ٹو دی ایشو کی جانب سے جانچ پڑتال، پراسپیکٹس کی تیاری اور اس میں فراہم کردہ معلومات کی تصدیق کا جائزہ لیا جائے گا۔ آڈیٹر کے تیار کردہ آڈٹ شدہ حسابات کا بھی جائزہ لیا جائے گا۔

اس کے علاوہ آئی پی او کی درخواستوں کی جانچ اور منظوری کے لیے ایس ای سی پی کے داخلی طریقہ کار کا بھی جائزہ لیا جائے گا۔

کمیشن کے مطابق انکوائری رپورٹ کے نتائج کی روشنی میں آئی پی او کے نظام کو مزید مؤثر بنایا جائے گا۔ اس ضمن میں معلومات کی درست اور مکمل فراہمی، آڈیٹرز اور کنسلٹنٹس کی ذمہ داریوں، اہم معاملات کی بروقت نشاندہی اور رپورٹنگ، جبکہ پاکستان اسٹاک ایکسچینج اور ایس ای سی پی کے درمیان رابطہ کاری کو بہتر بنانے کے اقدامات کیے جائیں گے۔

ایس ای سی پی کے چیئرمین ڈاکٹر کبیر سدھو نے کہا کہ ہر آئی پی او کے لیے معلومات کی فراہمی، شفافیت، جانچ پڑتال اور احتساب کے واضح معیار پر پورا اترنا ضروری ہے۔ خامیوں یا غفلت کے شواہد ملنے پر سخت کارروائی کی جائے گی اور آئی پی او نظام میں موجود نقائص دور کیے جائیں گے۔

انہوں نے کہا کہ کمیشن کا مقصد معلومات کی درست فراہمی پر مبنی شفاف اور سخت منظوری کا نظام قائم کرنا ہے، جو سرمایہ کاروں کے مفادات کا تحفظ کرنے کے ساتھ سرمایہ کاری کے خواہش مند کاروباری اداروں کی بھی معاونت کرے۔

ایس ای سی پی کے مطابق تحقیقات کی رپورٹ کے نتائج عام کیے جائیں گے۔