سیوی: محتسب کے ریجنل آفس میں کھلی کچہری، شہریوں کی شکایات سنی گئیں

سیوی: صوبائی محتسب اعلیٰ بلوچستان سعادت اللہ خان بازئی کی خصوصی ہدایات پر ریجنل آفس محتسب سیوی میں عوامی مسائل کے حل اور شکایات کے ازالے کے لیے کھلی کچہری کا انعقاد کیا گیا۔

کھلی کچہری کی صدارت اسسٹنٹ ڈائریکٹر محتسب سیوی مہراللہ سومرو نے کی، جبکہ اس موقع پر اسسٹنٹ رجسٹرار محتسب مزمل لاشاری سمیت مختلف محکموں کے افسران اور سربراہان بھی موجود تھے۔

کھلی کچہری کے دوران شہریوں نے مختلف سرکاری محکموں سے متعلق اپنے مسائل اور شکایات پیش کیں اور انہیں تحریری طور پر بھی جمع کروایا۔

اسسٹنٹ ڈائریکٹر مہراللہ سومرو نے شہریوں کے مسائل غور سے سنے اور متعلقہ محکموں کے افسران کو ان کے حل کے لیے ضروری اقدامات کرنے کی ہدایت کی۔

محتسب کا دائرہ کار

اس موقع پر اسسٹنٹ ڈائریکٹر مہراللہ سومرو نے ادارہ صوبائی محتسب کے دائرہ کار اور ذمہ داریوں پر روشنی ڈالتے ہوئے کہا کہ صوبائی محتسب کا ادارہ سرکاری محکموں کی بدانتظامی، غیر ضروری تاخیر، اختیارات کے ناجائز استعمال اور عوامی شکایات کے ازالے کے لیے کام کرتا ہے۔

ادارے کا بنیادی مقصد شہریوں کو فوری اور بلا معاوضہ انصاف کی فراہمی، سرکاری محکموں کی کارکردگی میں بہتری اور عوام کو درپیش مشکلات کا مؤثر حل یقینی بنانا ہے۔

انہوں نے کہا کہ عوام کو اپنی شکایات کے اندراج اور مسائل کے حل کے لیے محتسب کے ادارے سے بھرپور استفادہ کرنا چاہیے۔

عوامی مسائل کے فوری ازالے اور سرکاری اداروں کو عوام کے سامنے جوابدہ بنانے کے لیے آئندہ بھی اس طرح کی کھلی کچہریوں کا انعقاد جاری رکھا جائے گا تاکہ شہریوں کو ان کی دہلیز پر انصاف اور ریلیف کی فراہمی ممکن بنائی جا سکے۔

تصویر: بشکریہ ڈی جی پی آر بلوچستان