اوتھل: کمشنر لسبیلہ ڈویژن سائرہ عطاء کی صدارت میں محکمہ مواصلات و تعمیرات کے منصوبوں پر اجلاس

اوتھل: کمشنر لسبیلہ ڈویژن سائرہ عطاء کی زیرِ صدارت ضلع لسبیلہ میں محکمہ مواصلات و تعمیرات (C&W) کے تحت جاری اور مجوزہ ترقیاتی منصوبوں پر پیشرفت کے حوالے سے اجلاس منعقد ہوا۔

اجلاس میں ڈپٹی کمشنر حمیرا بلوچ، ایس پی لسبیلہ نجیب اللہ پندرانی اور ایکسیئن روڈ شریک ہوئے۔ محکمہ مواصلات و تعمیرات کے انجینئر نے ضلع بھر میں سڑکوں کی تعمیر و مرمت اور دیگر ترقیاتی اسکیموں سے متعلق کمشنر لسبیلہ کو تفصیلی بریفنگ دی۔

بریفنگ کے دوران ترقیاتی منصوبوں کی موجودہ صورتحال، پیش رفت، تکمیل کی مدت اور درپیش مسائل کے بارے میں کمشنر کو آگاہ کیا گیا۔

کمشنر کی ہدایات

کمشنر لسبیلہ ڈویژن نے ہدایت کی کہ تمام ترقیاتی منصوبوں پر کام مقررہ معیار اور معیاد کے مطابق مکمل کیا جائے۔ انہوں نے منصوبوں کی مؤثر نگرانی، تعمیراتی کاموں کے معیار کو یقینی بنانے اور اسکیموں میں شفافیت برقرار رکھنے پر زور دیا۔

انہوں نے سرکاری افسران کو ہدایت کی کہ منصوبوں میں حائل رکاوٹیں فوری دور کی جائیں اور تمام اسکیموں پر پیش رفت کی باقاعدگی سے نگرانی کرتے ہوئے رپورٹ پیش کی جائے، تاکہ عوام کو بہتر سفری سہولیات اور معیاری بنیادی ڈھانچہ فراہم کیا جا سکے۔

تصویر: بشکریہ ڈی جی پی آر بلوچستان