اوزی آسبورن آخری کنسرٹ کے بعد وفات کے دن تک خوش تھے، شیرن آسبورن

ہیوی میٹل کے معروف گلوکار اوزی آسبورن کی اہلیہ شیرن آسبورن نے کہا ہے کہ آخری کنسرٹ نے اوزی کو وفات کے دن تک خوشی اور جوش میں رکھا۔ وہ لندن میں فلم «Ozzy & Black Sabbath: Back to the Beginning» کی اسکریننگ سے خطاب کر رہی تھیں۔

فلم 5 جولائی 2025 کو برمنگھم میں ہونے والے شو پر مبنی ہے، جو 76 سال کی عمر میں اوزی کی وفات سے چند ہفتے پہلے ہوا۔ اس میں اوزی اور بلیک سبث کی آخری پرفارمنس کے ساتھ میٹالیکا، گنز این روزز، سلیئر، پینٹیرا اور ٹول جیسے بینڈز بھی شامل تھے۔

شیرن کے مطابق اوزی ایک بار پھر پرفارم کر کے سب کا شکریہ ادا کرنا اور الوداع کہنا چاہتے تھے۔ ایمفائزیما کے باعث ان کی آواز کا کچھ پتا نہیں ہوتا تھا، مگر وہ ذہنی طور پر پوری طرح تیار تھے۔ شیرن نے کہا کہ وہ ہنس رہے تھے اور لطیفے سنا رہے تھے، جو برسوں بعد دیکھنے میں آیا۔

انہوں نے بتایا کہ بلیک سبث کے دیگر ارکان کو بھی اوزی کی بیماری کی شدت کا اندازہ نہیں تھا، یہاں تک کہ بچوں کو بھی نہیں بتایا گیا تھا۔ کنسرٹ کے دن وہ خود فکرمند تھیں، لیکن اوزی ہر پرفارمنس دیکھ کر ڈریسنگ روم میں تالیاں بجاتے رہے۔

شیرن کے مطابق تقریب کی میزبانی اداکار جیسن موموا نے کی، جنہیں اس ذمہ داری کا پہلے سے پوری طرح علم نہیں تھا۔ فلم میں پس پردہ مناظر بھی شامل ہیں۔ فلم 28 اکتوبر کو ٹریفلگر ریلیزنگ کے ذریعے دنیا بھر کے سینماؤں میں پیش کی جائے گی۔