جھل مگسی سی آر سی فیز تھری: کمشنر نصیرآباد نے 14 امیدواروں کی شکایات سنیں، اسناد کی تصدیق ہوگی

نصیرآباد: حکومت بلوچستان کی میرٹ پر مبنی پالیسی کے مطابق محکمہ تعلیم میں حقدار امیدواروں کی داد رسی اور شکایات کے ازالے کے لیے ضلع جھل مگسی کی سی آر سی فیز تھری کا اجلاس کمشنر نصیرآباد ڈویژن صلاح الدین نورزئی کی زیرِ صدارت منعقد ہوا۔

اجلاس میں ڈویژنل ڈائریکٹر اسکولز محمد عظیم ساجدی، ڈسٹرکٹ ایجوکیشن آفیسر جھل مگسی قرۃ العین مگسی، پرنسپل ڈگری کالج نصیرآباد پروفیسر سمیع اللہ کھوسہ سمیت دیگر متعلقہ افسران نے شرکت کی۔

عربی، جونیئر انگلش ٹیچر اور معلم القرآن کی آسامیوں کے حوالے سے مجموعی طور پر 14 امیدواروں، جن میں مرد و خواتین شامل تھے، نے اعتراضات اور شکایات پیش کیں۔ کمشنر نے تمام شکایت کنندگان کو فرداً فرداً سنا اور ان کے اعتراضات کا تفصیلی جائزہ لیا۔ زیادہ تر شکایات امیدواروں کی مبینہ جعلی ڈگریوں اور دیگر متعلقہ امور کے بارے میں تھیں۔

سماعت کے دوران کمشنر نے متعدد امیدواروں کو میرٹ اور دستیاب ریکارڈ کی بنیاد پر اہل قرار دیا، جبکہ دیگر امیدواروں کو یقین دلایا کہ ڈگریوں اور تعلیمی اسناد کی ڈویژنل ڈائریکٹر اسکولز کے ذریعے باقاعدہ تصدیق کرائی جائے گی تاکہ شفاف جانچ پڑتال کے بعد حقدار امیدواروں کے ساتھ انصاف کے تقاضے پورے کیے جا سکیں۔

کمشنر صلاح الدین نورزئی نے کہا کہ وزیر اعلیٰ بلوچستان میر سرفراز بگٹی اور چیف سیکرٹری بلوچستان شکیل قادر خان کی میرٹ پر مبنی پالیسی پر عملدرآمد یقینی بنایا جا رہا ہے اور کسی بھی امیدوار کی حق تلفی برداشت نہیں کی جائے گی۔ انہوں نے کہا کہ تمام بھرتیوں میں شفافیت، میرٹ اور قواعد و ضوابط کی مکمل پاسداری یقینی بنائی جائے گی تاکہ اہل اور حقدار امیدواروں کو ان کا جائز حق مل سکے۔

تصویر: بشکریہ ڈی جی پی آر بلوچستان