جیوانی کو پانی کی فراہمی متاثر: چیئرمین ضلع کونسل شئے مختار کا نگور شریف میں ٹوٹی پائپ لائن کا معائنہ

گوادر: چیئرمین ضلع کونسل شئے مختار نے نگور شریف کے مقام پر انکاڑہ کور ڈیم سے جیوانی شہر کو پینے کا پانی فراہم کرنے والی مین سپلائی پائپ لائن کا دورہ کیا اور ٹوٹ پھوٹ کا شکار پائپ لائن کی موجودہ صورتحال اور جاری مرمتی کام کا جائزہ لیا۔ پائپ لائن متاثر ہونے کے باعث جیوانی شہر کو پانی کی ترسیل میں مشکلات پیش آ رہی ہیں۔

ایکسیئن پبلک ہیلتھ انجینئرنگ مومن بلوچ نے چیئرمین کو متاثرہ پائپ لائن کی مرمت، جاری کام کی پیش رفت اور جیوانی شہر کو پینے کے صاف پانی کی فراہمی کے نظام پر تفصیلی بریفنگ دی اور پائپ لائن کو درپیش مسائل اور پانی کی ترسیل بحال کرنے کے لیے جاری اقدامات سے آگاہ کیا۔

شئے مختار نے موقع پر پائپ لائن کا معائنہ کرتے ہوئے زور دیا کہ پانی کی فراہمی میں حائل رکاوٹیں فوری دور کرنے کے لیے مؤثر اقدامات کیے جائیں تاکہ جیوانی کے شہریوں کو پینے کے صاف پانی کی فراہمی کی بحالی میں مزید تاخیر نہ ہو۔

واضح رہے کہ پائپ لائن نگور شریف کے مقام پر ٹوٹنے کے باعث متاثر ہوئی ہے اور اس کی بحالی کے لیے پبلک ہیلتھ انجینئرنگ کا عملہ مرمتی کام کر رہا ہے۔ مرمت سے جیوانی شہر میں پانی کی فراہمی بحال کرنے اور شہریوں کی مشکلات کم کرنے میں مدد ملے گی۔

تصویر: بشکریہ ڈی جی پی آر بلوچستان