زیارت: ڈپٹی کمشنر عبدالقدوس اچکزئی کی زیرِ صدارت پولیو مہم کے دوسرے روز ایوننگ ریویو اجلاس

زیارت: ڈپٹی کمشنر زیارت عبدالقدوس اچکزئی کی زیرِ صدارت چار روزہ انسدادِ پولیو مہم کے دوسرے روز مانیٹرنگ افسران، زونل سپروائزرز اور یونین کونسل انچارجز کا ایوننگ ریویو اجلاس ہوا، جس میں مہم کی مجموعی کارکردگی، فیلڈ میں پیش رفت اور درپیش مسائل کا جائزہ لیا گیا۔

اجلاس میں ڈسٹرکٹ ہیلتھ آفیسر ڈاکٹر محمد رفیق مستوئی، ڈی ایس ایم پی پی ایچ آئی ممتاز رند، تحصیلدار زیارت نور احمد پانیزئی اور تمام یونین کونسل انچارجز نے شرکت کی۔ یونین کونسل انچارجز نے اپنے علاقوں میں مہم پر بریفنگ دی اور فیلڈ کے مسائل سے آگاہ کیا۔

ڈپٹی کمشنر نے ہدایت کی کہ پانچ سال سے کم عمر کوئی بچہ پولیو کے حفاظتی قطروں سے محروم نہ رہے، گھر گھر جا کر قطرے پلانے کا عمل یقینی بنایا جائے اور رہ جانے والے بچوں کی بروقت نشاندہی کی جائے۔

انہوں نے کہا کہ انسدادِ پولیو مہم اہم قومی ذمہ داری ہے اور مہم کے دوران کسی قسم کی غفلت، سستی یا کوتاہی برداشت نہیں کی جائے گی۔ انہوں نے مانیٹرنگ افسران کو ٹیموں کی مؤثر نگرانی، روزانہ پیش رفت کے جائزے اور مسائل کے فوری حل کی ہدایت کی۔

تصویر: بشکریہ ڈی جی پی آر بلوچستان