صحبت پور: ڈپٹی کمشنر فریدہ ترین کا زیرِ تعمیر ریسکیو 1122 عمارت کا دورہ، تعمیراتی معیار پر عدم اطمینان

صحبت پور: ڈپٹی کمشنر صحبت پور فریدہ ترین نے ریسکیو 1122 کی زیرِ تعمیر عمارت کا تفصیلی دورہ کیا اور مختلف حصوں میں جاری تعمیراتی کام کا باریک بینی سے جائزہ لیا۔ متعلقہ افسران اور تعمیراتی عملے نے انہیں منصوبے کی موجودہ پیش رفت، تعمیراتی مراحل اور دیگر امور پر بریفنگ دی۔

ڈپٹی کمشنر نے عمارت میں استعمال ہونے والے تعمیراتی میٹریل، جاری کام اور مجموعی معیار کا معائنہ کیا۔ انہوں نے بعض تعمیراتی امور اور معیار پر عدم اطمینان کا اظہار کرتے ہوئے واضح ہدایت کی کہ تعمیراتی کام میں کسی قسم کی کوتاہی یا غیر معیاری میٹریل کا استعمال ہرگز برداشت نہ کیا جائے۔

فریدہ ترین نے ہدایت کی کہ عمارت کی تعمیر پی سی ون میں مقررہ ڈیزائن، منظور شدہ تخمینے، تکنیکی specifications اور معیار کے عین مطابق یقینی بنائی جائے اور کام کی باقاعدگی سے نگرانی کی جائے۔ انہوں نے کہا کہ شفافیت اور معیار کو اولین ترجیح دی جائے اور منصوبے کی تکمیل کے دوران تعمیراتی ضوابط اور سرکاری ہدایات پر مکمل عملدرآمد کیا جائے۔

تصویر: بشکریہ ڈی جی پی آر بلوچستان