لسبیلہ: آر سی ڈی شاہراہ سے تین بارودی مواد ناکارہ، بم ڈسپوزل ٹیم کو سرٹیفکیٹ کا اعلان

اوتھل: کمشنر لسبیلہ ڈویژن کے دفتر سے جاری سرکاری ہینڈ آؤٹ کے مطابق ضلع لسبیلہ کی تحصیل بیلہ میں آر سی ڈی ہائی وے پر تخریب کاری اور امن و امان کو نقصان پہنچانے کی نیت سے بچھائے گئے تین انتہائی خطرناک دیسی ساختہ بارودی مواد (IEDs) کی موجودگی کی خفیہ اطلاع پر اسپیشل برانچ کی ٹیکنیکل بی ڈی (بم ڈسپوزل) ٹیم نے ہنگامی آپریشن کیا۔

ٹیم نے پیشہ ورانہ مہارت کا مظاہرہ کرتے ہوئے ہائی وے کے تین مختلف مقامات، کشاری سکن ویلپٹ میں بارودی مواد کو بروقت ٹریس کیا اور اسے محفوظ طریقے سے ناکارہ بنایا۔

کمشنر لسبیلہ ڈویژن سائرہ عطاء نے ٹیم کے جوانوں کی جرات کو سراہتے ہوئے حسنِ کارکردگی سرٹیفکیٹ جاری کرنے کا اعلان کیا ہے۔

کمشنر لسبیلہ سائرہ عطاء کا کہنا ہے کہ اسپیشل برانچ کی ٹیکنیکل بم ڈسپوزل ٹیم کے جوانوں نے قلیل وقت میں انتہائی پیشہ ورانہ مہارت کے ساتھ تین آئی ڈیز کو ناکارہ بنایا۔ ان کی اس فوری اور کامیاب کارروائی کی بدولت آر سی ڈی شاہراہ پر ملک دشمن عناصر کا ناپاک منصوبہ خاک میں مل گیا۔ ضلعی انتظامیہ اپنے ان جرات مند افسران اور جوانوں کی خدمات کو قدر کی نگاہ سے دیکھتی ہے۔