لورالائی میں یومِ آزادی: ڈپٹی کمشنر کیپٹن (ر) محمد حسیب شجاع نے ڈی سی آفس میں پرچم سربلند کیا

لورالائی: لورالائی میں پاکستان کا 79واں یومِ آزادی ملی جوش و جذبے، قومی یکجہتی اور وطن سے والہانہ محبت کے عزم کے ساتھ منایا گیا۔ ضلعی انتظامیہ کے زیرِ اہتمام ڈپٹی کمشنر آفس میں پروقار تقریب ہوئی جس میں ڈپٹی کمشنر کیپٹن (ر) محمد حسیب شجاع نے چاق و چوبند پولیس دستے کے ہمراہ قومی پرچم سربلند کیا۔ قومی ترانے کی گونج میں پولیس دستے نے سلامی پیش کی اور شرکاء نے ملک کی سلامتی، استحکام، ترقی اور خوشحالی کے لیے دعائیں کیں۔

تقریب میں ایس ایس پی ڈاکٹر فہد احمد، ایڈیشنل ڈپٹی کمشنر ریونیو محمد اسماعیل مینگل، اسسٹنٹ کمشنر ندیم اکرم، ایڈیشنل ڈپٹی کمشنر جنرل نواز علی جمالی، ڈپٹی ڈائریکٹر اسپورٹس نصیب اللہ کاکڑ، ڈسٹرکٹ ایجوکیشن آفیسر بختیار کاکڑ، ڈسٹرکٹ اسپورٹس آفیسر ظہیر احمد بلوچ، انجمن تاجران کے نمائندوں، ضلعی محکموں کے افسران و اہلکاروں اور معززین نے شرکت کی۔

ڈپٹی کمشنر محمد حسیب شجاع اور ایس ایس پی ڈاکٹر فہد احمد نے خطاب میں کہا کہ پاکستان کی آزادی اللہ تعالیٰ کی عظیم نعمت ہے جس کے لیے ہمارے بزرگوں نے بے مثال قربانیاں دیں، اور ملک و قوم کی ترقی، امن اور خوشحالی کے لیے ذمہ داریاں پوری دیانت داری سے ادا کی جائیں گی۔ مقررین نے کہا کہ بلوچستان سمیت ملک کے تمام علاقوں کی یکساں اور پائیدار ترقی ہی مضبوط، خوشحال اور مستحکم پاکستان کی ضمانت ہے، اور موجودہ دور میں قومی اتحاد، باہمی رواداری، امن اور اجتماعی ذمہ داریوں کو فروغ دینا وقت کی اہم ضرورت ہے۔

شرکاء نے قائداعظم محمد علی جناحؒ کے اصولوں اتحاد، ایمان اور تنظیم کو مشعلِ راہ بناتے ہوئے پاکستان کی سلامتی، خودمختاری، ترقی اور خوشحالی کے لیے ہر ممکن کردار ادا کرنے کے عزم کا اعادہ کیا۔

تصویر: بشکریہ ڈی جی پی آر بلوچستان