مچھ میں کان کنوں کی حفاظت اور محفوظ کان کنی پر آگاہی واک، انسپکٹر آف مائنز قربان علی عمرانی کی قیادت

مچھ: انسپکٹر آف مائنز مچھ قربان علی عمرانی کی قیادت میں کان کنوں کی حفاظت، سلامتی، پیشہ ورانہ صلاحیتوں کے فروغ اور محفوظ کان کنی کے حوالے سے آگاہی واک کا انعقاد کیا گیا، جس میں محکمہ مائنز کے افسران و اہلکاروں کے علاوہ بڑی تعداد میں کان کنوں اور عوام نے شرکت کی۔ شرکاء نے حفاظتی تدابیر، حفاظتی آلات کے استعمال اور حادثات سے بچاؤ کے پیغامات پر مبنی بینرز اٹھا رکھے تھے۔

الیکٹرک انسپکٹر آف مائنز مچھ عارف حسین عمرانی نے کانوں میں بجلی کے نظام، برقی آلات کے محفوظ استعمال اور مناسب ارتھنگ سمیت حفاظتی اقدامات کی اہمیت پر روشنی ڈالی، جبکہ قربان علی عمرانی نے حفاظتی قوانین پر سختی سے عملدرآمد، حفاظتی آلات کے استعمال، گیس کی بروقت نشاندہی، مؤثر وینٹی لیشن، کانوں کی چھت کو محفوظ بنانے اور خطرناک یا متروک حصوں کو مناسب طریقے سے بند کرنے پر تفصیلی آگاہی دی۔

جونیئر انسپکٹر آف مائنز محمد اسامہ ترین نے احتیاطی تدابیر، حفاظتی سامان کے درست استعمال اور ہنگامی صورتحال میں مقررہ طریقہ کار پر عمل کی ضرورت پر زور دیتے ہوئے کہا کہ حفاظتی اصولوں پر سنجیدگی سے عملدرآمد حادثات کی روک تھام اور انسانی جانوں کے تحفظ میں بنیادی کردار ادا کرتا ہے۔

افسران نے کہا کہ کان کنوں کا ریسکیو انتظامات، ہنگامی راستوں اور حفاظتی طریقہ کار سے مکمل آگاہ ہونا ضروری ہے اور معمولی غفلت کو بھی نظر انداز نہیں کیا جانا چاہیے۔ عوامی حلقوں اور کان کنوں نے آگاہی واک کو سراہتے ہوئے کہا کہ ایسی مہمات حادثات کی روک تھام اور انسانی جانوں کے تحفظ میں مؤثر کردار ادا کرتی ہیں۔

تصویر: بشکریہ ڈی جی پی آر بلوچستان