نصیرآباد ڈویژن کے سڑکوں کے منصوبے پی سی ون کے مطابق مکمل کیے جائیں گے: کمشنر صلاح الدین نورزئی

نصیرآباد: کمشنر نصیرآباد ڈویژن صلاح الدین نورزئی نے کہا ہے کہ وزیر اعلیٰ بلوچستان میر سرفراز بگٹی اور چیف سیکرٹری بلوچستان شکیل قادر خان کے احکامات کی روشنی میں نصیرآباد ڈویژن میں سڑکوں کے ترقیاتی منصوبوں کو پی سی ون کے مطابق مکمل کرنے کے لیے ڈویژنل انتظامیہ تمام دستیاب وسائل بروئے کار لائے گی اور محکمہ مواصلات و تعمیرات روڈز کے انجینئرز کو مکمل معاونت فراہم کرتے ہوئے جاری منصوبے مقررہ مدت میں مکمل کروائے جائیں گے تاکہ عوام ان اقدامات سے بھرپور استفادہ کر سکیں۔

وہ مواصلات و تعمیرات روڈز کے جاری ترقیاتی منصوبوں اور درپیش مسائل کے جائزے کے لیے منعقدہ اجلاس کی صدارت کر رہے تھے۔ اجلاس میں سپرنٹنڈنگ انجینئرز فدا حسین کھوسہ اور ارسلا رند، پروجیکٹ ڈائریکٹر صحبت پور کشمور روڈ ظفر کھوسہ، ایگزیکٹو انجینئرز عبدالستار بنگلزئی، بوستان خان چانڈیو، مجیب الرحمن ہاشمی، غلام دستگیر زہری، سب ڈویژنل آفیسرز نادر علی پہنور اور بشیر شاہ سمیت دیگر افسران موجود تھے، جنہوں نے اپنے اپنے اضلاع میں جاری منصوبوں کی پیش رفت اور مسائل پر بریفنگ دی۔

کمشنر نے ہدایت کی کہ جو منصوبے تکمیل کے مراحل میں داخل ہو چکے ہیں انہیں مزید تاخیر کے بغیر مکمل کیا جائے اور کسی منصوبے کو کھٹائی میں نہ پڑنے دیا جائے۔ انہوں نے کہا کہ سڑکوں کے منصوبوں کی بروقت تکمیل عوام کے وسیع تر مفاد میں ہے اور اس سے محکمے کی کارکردگی اور مورال بھی وابستہ ہے۔

انہوں نے افسران کو ہدایت کی کہ ترقیاتی منصوبوں کے فنڈز سمیت دیگر مسائل سے حکام بالا کو باقاعدگی سے تحریری طور پر آگاہ کرتے رہیں تاکہ بروقت اقدامات کرکے رکاوٹیں دور کی جا سکیں۔

تصویر: بشکریہ ڈی جی پی آر بلوچستان