چمن: اسپیکر عبدالخالق اچکزئی اور ڈپٹی کمشنر کی زیرِ صدارت ڈی سی سی اجلاس، BSDI فیز-III منصوبوں کو حتمی شکل

چمن: اسپیکر بلوچستان اسمبلی کیپٹن (ر) عبدالخالق اچکزئی اور ڈپٹی کمشنر چمن حبیب احمد بنگلزئی کی زیرِ صدارت ڈسٹرکٹ کوآرڈینیشن کمیٹی (DCC) چمن کا اہم اجلاس ڈپٹی کمشنر آفس چمن میں منعقد ہوا، جس میں کمانڈر چمن اسکاؤٹس کی معاونت و شرکت کے ساتھ ضلع میں جاری ترقیاتی امور اور BSDI فیز-III کے تحت ترقیاتی منصوبوں کو حتمی شکل دینے سے متعلق امور کا تفصیلی جائزہ لیا گیا۔

اجلاس میں ضلعی انتظامیہ، پولیس، چمن اسکاؤٹس، قانون نافذ کرنے والے اداروں، مختلف سرکاری محکموں اور متعلقہ افسران نے شرکت کی۔ BSDI فیز-III کے تحت تجویز کردہ ترقیاتی اسکیموں پر تفصیلی غور کیا گیا اور منصوبوں کی ترجیحات، عوامی ضروریات اور ضلع کی مجموعی ترقی کے تقاضوں کو مدنظر رکھتے ہوئے انہیں حتمی شکل دینے کے امور زیرِ بحث آئے۔

ڈپٹی کمشنر حبیب احمد بنگلزئی نے کہا کہ ترقیاتی منصوبوں کا مقصد عوام کو بنیادی سہولیات کی فراہمی، شہری و دیہی علاقوں کی ترقیاتی ضروریات پوری کرنا اور ضلع چمن میں پائیدار و متوازن ترقی یقینی بنانا ہے۔ انہوں نے ہدایت کی کہ ترقیاتی اسکیموں کی تیاری اور تکمیل میں شفافیت، معیار، ضرورت اور عوامی مفاد کو بنیادی ترجیح دی جائے۔

اجلاس میں متعلقہ محکموں کو ہدایت کی گئی کہ ترقیاتی منصوبوں سے متعلق تمام ضروری امور بروقت مکمل کر کے انہیں مقررہ طریقۂ کار کے مطابق آگے بڑھایا جائے تاکہ BSDI فیز-III کے منصوبوں سے عوام کو جلد از جلد عملی فائدہ پہنچ سکے۔ ضلعی انتظامیہ نے عوامی فلاح و بہبود اور ضلع کی مجموعی ترقی کے لیے ترقیاتی منصوبوں کی مؤثر، شفاف اور بروقت تکمیل کے عزم کا اعادہ کیا۔

تصویر: بشکریہ ڈی جی پی آر بلوچستان