ڈپٹی کمشنر استا محمد کا گنداخہ واٹر سپلائی اسکیم کا دورہ، سیف اللہ مگسی کینال سے تالابوں میں پانی کی منتقلی

استا محمد: ڈپٹی کمشنر استا محمد محمد رمضان پلال نے گنداخہ ٹاؤن میں پینے کے پانی کی صورتحال کا جائزہ لینے کے لیے گنداخہ واٹر سپلائی اسکیم اور پانی کی لفٹنگ کے مقام کا تفصیلی دورہ کیا اور تالابوں میں پانی کی منتقلی و لفٹنگ کے اقدامات کا معائنہ کیا۔

بریفنگ میں بتایا گیا کہ سیف اللہ مگسی کینال سے گنداخہ واٹر سپلائی کے تالابوں تک پانی پہنچانے کا عمل جاری ہے اور محکمہ پبلک ہیلتھ انجینئرنگ کے تالاب میں پانی پہنچ چکا ہے، جبکہ مزید ذرائع کو بھی تالابوں کی جانب منتقل کیا جا رہا ہے تاکہ گنداخہ ٹاؤن میں پانی کی فراہمی بحال اور بہتر ہو سکے۔

ڈپٹی کمشنر نے ہدایت کی کہ پانی کی لفٹنگ، منتقلی اور ذخیرہ کرنے کا عمل مزید تیز کیا جائے اور تمام مراحل کی مسلسل نگرانی کی جائے۔ انہوں نے کہا کہ پینے کے صاف پانی کی فراہمی انتظامیہ کی اولین ترجیح ہے اور اس میں کوئی غفلت یا تاخیر برداشت نہیں کی جائے گی۔

ضلعی انتظامیہ نے واضح کیا کہ سیف اللہ مگسی کینال سے منتقل ہونے والا پانی صاف اور تازہ ہے، گندہ یا مضرِ صحت نہیں، اور عوام سے اپیل کی کہ کسی غیر مصدقہ اطلاع، افواہ یا منفی پروپیگنڈے پر کان نہ دھریں بلکہ صرف سرکاری محکموں کی مستند معلومات پر اعتماد کریں۔

تصویر: بشکریہ ڈی جی پی آر بلوچستان