ڈپٹی کمشنر کیچ سے وفود کی ملاقات: پاک ایران بارڈر کی بندش اور آبسر انٹر کالج کے مسائل اٹھائے گئے

تربت: ڈپٹی کمشنر کیچ یاسر اقبال دشتی سے ضلع کیچ کے مختلف وفود نے ملاقات کی، جس میں عوام کو درپیش مختلف عوامی و اجتماعی مسائل پر تفصیلی تبادلہ خیال کیا گیا۔

ملاقات میں میونسپل کارپوریشن تربت کے چیف آفیسر شعیب ناصر، پی ڈی ایم اے کے ڈپٹی ڈائریکٹر ملک ریحان دشتی، انجمن تاجران کیچ کے صدر نثار احمد جوسکی، اعجاز احمد جوسکی، اسحاق روشن، عبدالرحمن سنگر، ظریف زدگ، ٹھیکیدار زبیر، کہدہ نور، فضل کریم، گلزار دوست، سیٹھ یاسین، جمال شکیل، احسان اور دیگر موجود تھے۔

وفود نے ڈپٹی کمشنر کو امن و امان کی صورتحال، پاک ایران بارڈر کی بندش، بی ایس ڈی آئی منصوبے اور دیگر عوامی مسائل سے آگاہ کیا اور آبسر انٹر کالج کی طالبات کے لیے بس سمیت دیگر ضروری سہولیات کا مطالبہ کیا۔

ڈپٹی کمشنر یاسر اقبال دشتی نے کہا کہ ضلعی انتظامیہ عوامی مسائل کے حل کے لیے بھرپور اقدامات کر رہی ہے اور امن و امان کی بہتری کے لیے متعلقہ اداروں کے ساتھ مربوط حکمت عملی کے تحت کام جاری ہے۔ پاک ایران سرحد سے متعلق معاملات کے حل اور سرحدی سرگرمیوں کی بحالی کے لیے متعلقہ حکام سے رابطہ جاری ہے اور بارڈر جلد کھولنے کے لیے اقدامات کیے جا رہے ہیں۔

انہوں نے یقین دہانی کرائی کہ آبسر انٹر کالج کے لیے چھ کمروں کی تعمیر اور ضروری فرنیچر کی فراہمی کو بی ایس ڈی آئی پروگرام میں شامل کرنے کے لیے اقدامات کیے جائیں گے، اور کہا کہ عوامی فلاح، تعلیمی سہولیات کی بہتری اور علاقے کی ترقی کے لیے دستیاب وسائل مؤثر انداز میں استعمال کیے جا رہے ہیں۔

تصویر: بشکریہ ڈی جی پی آر بلوچستان