وزیر اعلیٰ کے حکم پر کوئٹہ کے طوغی روڈ پر بند راستہ کھول دیا گیا، دیوار گرا کر آمدورفت بحال

کوئٹہ: وزیر اعلیٰ بلوچستان میر سرفراز بگٹی کے احکامات پر ڈپٹی کمشنر کوئٹہ مہراللہ بادینی نے علاقہ مکینوں کی شکایات کا نوٹس لیتے ہوئے طوغی روڈ پر بند راستہ فوری کھولنے کی ہدایت کی۔

اس سلسلے میں اسپیشل مجسٹریٹ اعجاز حسن کھوسہ نے میٹروپولیٹن کارپوریشن کوئٹہ کے افسران کے ہمراہ موقع کا دورہ کیا اور سڑک کے راستے میں تعمیر کی گئی دیوار گرا کر آمدورفت بحال کر دی۔ علاقہ مکینوں نے شکایت کی تھی کہ اسٹریٹ میں دیوار قائم کر کے راستہ بند کر دیا گیا ہے جس سے انہیں آمدورفت میں مشکلات کا سامنا ہے۔

ڈپٹی کمشنر مہراللہ بادینی نے ہدایت کی کہ عوامی راستوں اور سڑکوں پر غیر قانونی رکاوٹوں کا خاتمہ یقینی بنایا جائے تاکہ شہریوں کو آمدورفت میں کوئی دشواری نہ ہو۔

تصویر: بشکریہ ڈی جی پی آر بلوچستان