نصیرآباد: مسلح افراد کی فائرنگ سے دو پولیس اہلکار شہید، سرکاری اسلحہ لے گئے

نصیرآباد: پولیس تھانہ صدر کی حدود میں بیدار بیرون کے علاقے میں نامعلوم موٹر سائیکل سوار مسلح افراد کی فائرنگ سے ڈیوٹی پر مامور دو پولیس اہلکار احمد لاشاری اور عبدالملک بگٹی شہید ہوگئے۔

واقعے کے بعد ملزمان شہید اہلکاروں کا سرکاری اسلحہ بھی اپنے ساتھ لے گئے۔ اطلاع ملتے ہی پولیس موقع پر پہنچ گئی۔

ورثا کا دھرنا

شہید اہلکاروں کے ورثا نے لاشیں پٹ فیڈر پل قومی شاہراہ پر رکھ کر احتجاجی دھرنا دے دیا اور ملزمان کی گرفتاری کا مطالبہ کیا۔ دھرنے کے باعث سندھ بلوچستان قومی شاہراہ پر ٹریفک معطل ہوگئی۔

قائم مقام ایس ایس پی نصیرآباد معروف عثمان اور سابق صوبائی وزیر میر عبدالغفور لہڑی نے مظاہرین سے مذاکرات کیے، جس کے بعد ورثا نے احتجاج ختم کردیا۔

شہید اہلکاروں کی نماز جنازہ پولیس لائن ڈیرہ مراد جمالی میں ادا کی گئی، جس میں پولیس افسران اور شہریوں نے بڑی تعداد میں شرکت کی۔