دانیہ شاہ کے ناقابلِ ضمانت وارنٹ گرفتاری جاری، عامر لیاقت کی ویڈیوز کا مقدمہ

کراچی: جوڈیشل مجسٹریٹ ایسٹ کی عدالت نے مرحوم ٹی وی میزبان عامر لیاقت حسین کی نجی ویڈیوز وائرل کرنے کے مقدمے میں ملزمہ دانیہ شاہ کے ناقابلِ ضمانت وارنٹ گرفتاری جاری کر دیے ہیں۔

عدالت نے یہ حکم سماعت کے دوران ملزمہ کے پیش نہ ہونے پر دیا۔ اس کے ساتھ متعلقہ حکام کو ہدایت کی گئی کہ انہیں گرفتار کر کے عدالت میں پیش کیا جائے۔

سماعت کے دوران دانیہ شاہ کے وکیل نے ذاتی حاضری سے استثنیٰ کی درخواست دائر کی۔ مدعیہ کے وکیل نے اس پر اعتراض کیا، جس کے بعد عدالت نے درخواست مسترد کر دی۔

نجی ٹی وی کے مطابق عدالت نے کیس کی مزید سماعت 28 اکتوبر تک ملتوی کر دی ہے۔

یہ مقدمہ عامر لیاقت کی بیٹی کی مدعیت میں درج کیا گیا۔ ان کی شکایت پر سائبر کرائم نے ان کے والد کی نجی ویڈیوز کے پھیلائے جانے کے الزام میں مقدمہ درج کیا، جو اس وقت عدالتی کارروائی کے مراحل میں ہے۔

دی کرنٹ کی رپورٹ کے مطابق دانیہ شاہ پہلے عامر لیاقت کی اہلیہ رہ چکی ہیں۔ انہوں نے 2024 میں حکیم شہزاد، جو حکیم شہزاد لوہار کے نام سے بھی جانے جاتے ہیں، سے شادی کی۔ اسی رپورٹ کے مطابق جوڑے کے ہاں 2025 میں بیٹے دایان کی پیدائش ہوئی۔