بلوچستان میں ایف ڈبلیو او کی کارکردگی ناقص رہی: وزیراعلیٰ سرفراز بگٹی

کوئٹہ: بلوچستان کے وزیراعلیٰ سرفراز بگٹی نے کہا ہے کہ صوبے میں فرنٹیئر ورکس آرگنائزیشن (ایف ڈبلیو او) کے ساتھ کام کرنے کا تجربہ اچھا نہیں رہا۔ ان کے مطابق ایف ڈبلیو او کی بلوچستان میں کارکردگی ناقص رہی ہے۔

بلوچستان اسمبلی کے اجلاس میں نقطہ اعتراض پر رکن صوبائی اسمبلی ڈاکٹر عبدالمالک بلوچ نے کہا کہ این ایچ اے بلوچستان میں کام نہیں کر رہا، اور این ایچ اے کے پروجیکٹ ڈائریکٹر بلوچستان نہیں آتے۔

ڈاکٹر مالک بلوچ کے نقطہ اعتراض پر وزیراعلیٰ سرفراز بگٹی نے کہا کہ ان کا خیال تھا کہ ایف ڈبلیو او ایک منظم ادارہ ہے جو کوالٹی کی بات کرتا ہے۔ ہم نے انہیں بغیر ٹینڈر کے پروجیکٹس دیے، لیکن ان کے بقول ان کے اپنے علاقے میں ناقص سڑک بنائی گئی، جسے بعد میں حکومت کو خود درست کرنا پڑا۔

وزیراعلیٰ نے کہا کہ ایف ڈبلیو او پروجیکٹس لے کر پیٹی ٹھیکیداروں کو دے دیتا ہے اور وہ پیٹی ٹھیکیدار کام نہیں کرتے۔ انہوں نے کہا کہ پورا ایوان متفق ہے کہ ایف ڈبلیو او کو دیے گئے پروجیکٹس میں وہ بری طرح ناکام ہوا ہے۔

وزیراعلیٰ نے مزید کہا کہ صوبے میں ترقیاتی منصوبے عام بلوچستانی کے لیے ہیں۔ ان منصوبوں پر حملے کرنے، پل گرانے اور سڑکیں تباہ کرنے والے بلوچوں کے خیر خواہ نہیں ہیں، وہ صوبے کو لاحاصل جنگ میں ڈال رہے ہیں۔ ہم اس کی مذمت کرتے ہیں۔