خضدار: میر یونس عزیز زہری کی سربراہی میں محکموں کا ماہانہ جائزہ اجلاس

خضدار: ڈی سی آفس خضدار کے کانفرنس ہال میں ضلع خضدار کے تمام محکموں کا ماہانہ جائزہ اجلاس اپوزیشن لیڈر بلوچستان اسمبلی میر یونس عزیز زہری کی سربراہی میں منعقد ہوا۔ اجلاس میں ڈپٹی کمشنر خضدار عبدالرزاق ساسولی نے خصوصی طور پر شرکت کی۔

اجلاس کا آغاز تلاوتِ کلامِ پاک سے ہوا، جس کے بعد تمام محکموں نے باری باری اپنی ماہانہ کارکردگی رپورٹ پیش کی۔

محکموں کی بریفنگ

محکمہ صحت نے ہسپتالوں میں ادویات کی فراہمی، محکمہ تعلیم نے اسکولوں میں اساتذہ کی حاضری، جبکہ محکمہ بی اینڈ آر، پبلک ہیلتھ انجینئرنگ اور اربن پلاننگ نے جاری ترقیاتی اسکیموں، سڑکوں اور واٹر سپلائی اسکیموں پر تفصیلی بریفنگ دی۔ اس کے علاوہ محکمہ حیوانات، زراعت اور دیگر محکموں کے آفیسران نے بھی اپنے محکموں کے بارے میں بریفنگ دی۔

ہدایات

اجلاس کی صدارت کرتے ہوئے میر یونس عزیز زہری نے تمام محکموں کی کارکردگی کا تفصیلی جائزہ لیا اور کہا کہ عوام کی فلاح و بہبود کے لیے جاری ترقیاتی منصوبے کسی پر احسان نہیں بلکہ عوام کا حق ہیں۔ انہوں نے کہا کہ خضدار ایک پسماندہ ضلع ہے، یہاں کے عوام کو تعلیم، صحت، پانی اور سڑکوں جیسی بنیادی سہولیات کی فراہمی میں کوئی سمجھوتہ نہیں کیا جائے گا۔

انہوں نے واضح ہدایت کی کہ تمام ترقیاتی منصوبوں کو بروقت اور معیاری انداز میں مکمل کیا جائے اور ہر منصوبے میں شفافیت کو یقینی بنایا جائے تاکہ عوام کو بہتر اور دیرپا سہولیات میسر آ سکیں۔

میر یونس عزیز زہری نے مزید کہا کہ تمام محکموں کے افسران اپنے دفاتر میں عوام کے لیے آسانی پیدا کریں، عوامی مسائل کے حل میں کوتاہی نہ برتیں اور اپنی ذمہ داریاں احسن، ایمانداری اور فرض شناسی کے ساتھ نبھائیں۔ انہوں نے کہا کہ تمام محکمے اپنی ماہانہ کارکردگی رپورٹ تیار رکھیں اور وہ خود ان کے دفاتر جائیں گے، تاکہ جن محکموں کی کارکردگی خراب ہے ان کی نشاندہی ہو سکے۔

ڈپٹی کمشنر خضدار عبدالرزاق ساسولی نے کہا کہ اپوزیشن لیڈر میر یونس عزیز زہری کی ہدایات پر سو فیصد عمل درآمد کیا جائے گا اور عوام کو ریلیف دینے کے لیے ضلعی انتظامیہ ہر ممکن اقدامات کرے گی۔

تصویر: بشکریہ ڈی جی پی آر بلوچستان