گوادر پورٹ سے ایران تجارت: گبد۔ریمدان کوریڈور اور ٹی آئی آر نظام پر چیمبر آف کامرس سے مشاورت

گوادر: گوادر چیمبر آف کامرس اینڈ انڈسٹری کے وفد نے چیئرمین گوادر پورٹ نورالحق بلوچ سے ملاقات کی، جس میں گوادر پورٹ کے ذریعے ایران کے ساتھ تجارت کے فروغ، گبد۔ریمدان بارڈر کوریڈور کے استعمال اور ٹرانزٹ ٹریڈ سمیت دیگر تجارتی امور پر تفصیلی تبادلۂ خیال ہوا۔

اجلاس میں ڈائریکٹر جنرل گوادر پورٹ داؤد کلمتی بھی موجود تھے۔ وفد میں ایکسپورٹر تفتان امان اللہ جمالدینی، گوادر چیمبر کے سابق صدور جہیند ہوت اور شمس الحق کلمتی اور سابق جنرل سیکرٹری خالد سیف شامل تھے۔

گبد۔ریمدان: گوادر سے ایران کا مختصر ترین زمینی راستہ

ملاقات میں گوادر پورٹ سے گبد/ریمدان 250 بارڈر کے ذریعے تجارت، ٹرانسپورٹیشن، کسٹمز، سیکیورٹی، کنٹینرز کی نقل و حرکت اور ٹی آئی آر (TIR) نظام سے متعلق امور زیرِ بحث آئے۔ اس بات پر زور دیا گیا کہ گوادر سے ایران کے سرحدی علاقے تک مختصر ترین زمینی راستے سے بھرپور فائدہ اٹھا کر تجارتی سرگرمیوں کو وسعت دی جائے اور اس کوریڈور کو مؤثر انداز میں بروئے کار لایا جائے۔

شرکا نے گبد/ریمدان بارڈر پر پارکنگ، وزن کرنے کے کانٹے اور دیگر سرحدی سہولیات کی کمی یا ان سے جڑے مسائل کی نشاندہی بھی کی۔ بتایا گیا کہ ان مسائل اور تجارتی رکاوٹوں کو کسٹمز سمیت متعلقہ حکام کے ساتھ ہونے والے اجلاس میں اٹھایا جائے گا تاکہ سرحدی تجارت آسان بنانے کے لیے مؤثر اقدامات کیے جا سکیں۔

یہ آئندہ اجلاس 8 اکتوبر 2026ء کو کراچی میں ڈی جی ٹرانزٹ اینڈ ٹریڈ کسٹمز کی زیرِ صدارت ہونے والے ٹرانزٹ ٹریڈ اجلاس کا تسلسل ہوگا۔ کراچی اجلاس میں گوادر پورٹ کے ذریعے ایران سے زمینی تجارت، ٹی آئی آر نظام اور تجارتی رکاوٹوں کا جائزہ لینے کے بعد فیصلہ ہوا تھا کہ عملی پیش رفت کے لیے دوسرا اجلاس گوادر میں منعقد کیا جائے گا، جس میں متعلقہ حکام، تاجر برادری اور کلیئرنگ ایجنٹس شریک ہوں گے۔

تصویر: بشکریہ ڈی جی پی آر بلوچستان