اسسٹنٹ کمشنر گنداواہ کا بازار کا سرپرائز دورہ، نان کسٹم پیڈ سگریٹ کے 9 پیکٹ ضبط

گنداواہ: اسسٹنٹ کمشنر گنداواہ محمد رمضان کرد نے گنداواہ شہر کے مرکزی بازار کا سرپرائز دورہ کیا اور سبزی و فروٹ، گوشت اور دیگر اشیائے خورونوش کی قیمتوں، کوالٹی اور صفائی ستھرائی کا جائزہ لیا۔

انہوں نے مختلف دکانوں کا معائنہ کرتے ہوئے دکانداروں کو سرکاری نرخ نامے پر عملدرآمد اور پرائس لسٹ آویزاں کرنے کی ہدایات جاری کیں، اور بالخصوص سبزی فروشوں اور قصابوں کو سختی سے تنبیہ کی کہ سرکار کی مقرر کردہ قیمتوں کے مطابق گوشت، سبزی اور دیگر اشیا فروخت کریں۔ انہوں نے کہا کہ زائد المیعاد اشیا فروخت کرنے اور زائد نرخ وصول کرنے والے دکانداروں کے خلاف سخت کارروائی کی جائے گی۔

اسسٹنٹ کمشنر نے صفائی ستھرائی اور اشیا کے معیار پر زور دیا اور دکانوں کے آگے ناجائز تجاوزات اور عارضی تھڑے ہٹانے کی سختی سے تنبیہ کی۔ انہوں نے دکانوں پر رکھے نان کسٹم پیڈ سگریٹ کے 09 پیکٹ ضبط کر کے قانونی کارروائی کی اور دکانداروں کو غیر قانونی اشیا رکھنے اور فروخت کرنے سے روکنے کی ہدایات جاری کیں۔

تصویر: بشکریہ ڈی جی پی آر بلوچستان