اُستا محمد میں غیر رجسٹرڈ مدارس کی رجسٹریشن پر اسسٹنٹ کمشنر ماریہ شمعون کا علماء کے ساتھ اجلاس

اُستا محمد: ڈپٹی کمشنر اُستا محمد محمد رمضان پلال کی ہدایت پر اسسٹنٹ کمشنر اُستا محمد ماریہ شمعون کی زیرِ صدارت تحصیل اُستا محمد میں غیر رجسٹرڈ مدارس کے علمائے کرام، منتظمین اور متعلقہ نمائندگان کے ساتھ اہم اجلاس منعقد ہوا، جس میں مدارس کی رجسٹریشن کے عمل، طریقہ کار، ضروری دستاویزات اور متعلقہ امور سے آگاہی دی گئی۔

اسسٹنٹ کمشنر نے منتظمین کو رجسٹریشن کے لیے درکار دستاویزات، ریکارڈ کی تکمیل اور مقررہ طریقہ کار کے مطابق درخواست جمع کرانے پر تفصیلی بریفنگ دی۔ انہوں نے کہا کہ رجسٹریشن کے تمام قانونی اور انتظامی تقاضے پورے کرنا ضروری ہے تاکہ مدارس کو درپیش انتظامی امور باقاعدہ طریقہ کار کے تحت حل کیے جا سکیں۔

علمائے کرام اور منتظمین نے رجسٹریشن کے عمل میں درپیش مسائل، مشکلات اور تحفظات سے آگاہ کیا جنہیں غور سے سنا گیا۔ اسسٹنٹ کمشنر نے رہنمائی فراہم کرتے ہوئے یقین دہانی کرائی کہ رجسٹریشن کا عمل سہل بنانے اور مدارس کی انتظامیہ کو درکار معاونت فراہم کرنے کے لیے ہر ممکن تعاون کیا جائے گا۔

اجلاس میں زور دیا گیا کہ مدارس کی انتظامیہ رجسٹریشن بروقت مکمل کرنے کے لیے حکام سے تعاون کرے اور مطلوبہ دستاویزات و ریکارڈ مکمل رکھے۔ اجلاس کا مقصد علماء اور منتظمین کو رجسٹریشن کے مکمل طریقہ کار سے آگاہ کرنا، ان کے مسائل کا جائزہ لینا اور رجسٹریشن کے عمل کو آسان، شفاف اور مؤثر بنانا تھا۔

تصویر: بشکریہ ڈی جی پی آر بلوچستان