بارکھان: ڈویژنل ڈائریکٹر ہیلتھ سروسز کا ڈی ایچ کیو ہسپتال کا اچانک دورہ، طبی سہولیات کا جائزہ

بارکھان: وزیراعلیٰ بلوچستان میر سرفراز بگٹی کے وژن کے تحت عوام کو ان کی دہلیز پر معیاری طبی سہولیات کی فراہمی یقینی بنانے کے سلسلے میں ڈویژنل ڈائریکٹر ہیلتھ سروسز کوہِ سلیمان ڈویژن ڈاکٹر مہردین کھیتران نے ڈسٹرکٹ ہیڈکوارٹر (ڈی ایچ کیو) ہسپتال بارکھان کا اچانک دورہ کیا۔ ڈپٹی ڈی ایچ او ڈاکٹر ماجد خان بھی ان کے ہمراہ تھے۔

شعبہ جات اور مریضوں کا جائزہ

ڈاکٹر مہردین کھیتران نے ہسپتال کے مختلف شعبہ جات کا معائنہ کرتے ہوئے طبی سہولیات اور انتظامی امور کا جائزہ لیا۔ دورے کے دوران انہوں نے مریضوں سے ملاقات کی اور انہیں فراہم کی جانے والی طبی سہولیات کے بارے میں معلومات حاصل کیں۔

انہوں نے طبی عملے سے بھی ملاقات کی اور ہسپتال کی مجموعی کارکردگی، علاج معالجے کی سہولیات اور سروسز کی بہتری سے متعلق امور پر تبادلہ خیال کیا۔

ویکسین فریج، ادویات اور ڈائیلاسز وارڈ

ڈاکٹر مہردین کھیتران نے ویکسین فریج، ادویات کے اسٹاک، نیوٹریشن سینٹر اور ڈائیلاسز وارڈ کا خصوصی معائنہ کیا اور متعلقہ عملے سے دستیاب سہولیات، ادویات کی فراہمی اور انتظامی امور کے بارے میں بریفنگ لی۔

اس موقع پر انہوں نے ہدایت کی کہ ہسپتال میں طبی سہولیات کی بہتری، ادویات کی دستیابی اور مریضوں کو بروقت معیاری علاج کی فراہمی کو ہر صورت یقینی بنایا جائے۔ انہوں نے کہا کہ صحت کے شعبے میں عوام کو بہتر طبی سہولیات فراہم کرنا حکومت بلوچستان کی اولین ترجیحات میں شامل ہے۔