بلوچستان میں سکیورٹی فورسز کی کارروائی، فتنہ الہندوستان کے 5 دہشت گرد ہلاک، ٹھکانہ تباہ

کوئٹہ (اعتماد ڈیسک): بلوچستان میں سکیورٹی فورسز نے خفیہ اطلاع پر کارروائی کرتے ہوئے فتنہ الہندوستان کے 5 دہشت گردوں کو ہلاک اور ان کا ٹھکانہ تباہ کر دیا۔

پاک فوج کے شعبہ تعلقات عامہ (آئی ایس پی آر) کے مطابق یہ آپریشن بارہ اور تیرہ اکتوبر کی درمیانی شب دہشت گردوں کی موجودگی کی اطلاع ملنے پر کیا گیا، جس میں فورسز نے فوری اور مؤثر کارروائی کی۔

ذرائع کے مطابق ہلاک دہشت گرد بھارتی سرپرستی میں سرگرم تھے؛ ان کے قبضے سے اسلحہ، گولہ بارود اور دھماکا خیز مواد برآمد ہوا۔ علاقے میں موجود دیگر بھارتی سرپرستی یافتہ دہشت گردوں کے خاتمے کے لیے کلیئرنس آپریشن جاری ہے۔

آئی ایس پی آر نے کہا کہ عزمِ استحکام کے تحت سکیورٹی فورسز اور قانون نافذ کرنے والے اداروں کی انسداد دہشت گردی کارروائیاں پوری رفتار سے جاری رہیں گی اور بیرونی سرپرستی اور معاونت سے ہونے والی دہشت گردی کے خاتمے تک یہ عزم برقرار رہے گا۔