جامعہ گوادر کے بی ایس اکنامکس میں بلیو اکانومی کورس منظور، بورڈ آف اسٹڈیز کا دوسرا اجلاس

گوادر: جامعہ گوادر کے شعبہ معاشیات کے بورڈ آف اسٹڈیز کا دوسرا اجلاس پی سی ٹی وی آئی کے کانفرنس ہال میں منعقد ہوا، جس میں بی ایس اکنامکس پروگرام کے تعلیمی امور، نصابی اصلاحات اور طلبہ کی پیشہ ورانہ ضروریات کا جائزہ لیا گیا۔ اجلاس کی صدارت ڈین فیکلٹی آف سوشل سائنسز پروفیسر ڈاکٹر جان محمد نے کی، جبکہ چیئرپرسن شعبہ معاشیات محترمہ شمع سلیمان نے گفتگو کی قیادت کی۔

اجلاس میں بی ایس اکنامکس کے طلبہ کے لیے پیشہ ورانہ سرٹیفکیشن لازمی قرار دینے اور بین الشعبہ جاتی کورس «AI for Everyone» نصاب میں شامل کرنے کی تجاویز پر غور کیا گیا۔ بورڈ نے بی ایس اکنامکس پروگرام میں «بلیو اکانومی» کو اہم کورس کے طور پر متعارف اور منظور کرنے کا فیصلہ کیا۔

شرکاء نے کہا کہ گوادر کی ساحلی، بحری اور معاشی اہمیت کے پیش نظر بلیو اکانومی کی تعلیم طلبہ کو خطے کے معاشی مواقع اور جدید اقتصادی رجحانات سے بہتر طور پر روشناس کرائے گی۔ نصاب کو عصرِ حاضر کی تعلیمی، ڈیجیٹل اور پیشہ ورانہ ضروریات سے ہم آہنگ بنانے کے لیے جدید شعبوں، بین الشعبہ جاتی تعلیم اور علاقائی اہمیت کے مضامین شامل کرنے پر بھی زور دیا گیا۔

اجلاس میں فیکلٹی ممبران سلیمان، ڈائریکٹر کوالٹی انہانسمنٹ سیل ڈاکٹر رابعہ اسلم اور اکرام بلوچ شریک ہوئے، جبکہ بیرونی اراکین یونیورسٹی آف تربت کے اسسٹنٹ پروفیسر ڈاکٹر عبدالقیوم اور لسبیلہ یونیورسٹی آف ایگریکلچر، واٹر اینڈ میرین سائنسز کے اسسٹنٹ پروفیسر و رجسٹرار ڈاکٹر بالاچ رشید نے ویڈیو لنک کے ذریعے شرکت کی۔

تصویر: بشکریہ ڈی جی پی آر بلوچستان