جعفرآباد میں دودھ 280 روپے لیٹر بیچنے کی شکایات پر کارروائی، سرکاری نرخ 220 روپے پر عمل کی ہدایت

جعفرآباد: ڈپٹی کمشنر جعفرآباد خالد خان کو عوامی حلقوں کی جانب سے شکایات موصول ہوئیں کہ ضلع میں دودھ سرکاری نرخ سے زائد، یعنی 280 روپے فی لیٹر فروخت کیا جا رہا ہے، جس پر انہوں نے فوری نوٹس لیتے ہوئے متعلقہ حکام کو سخت کارروائی کی ہدایت کی۔

ڈپٹی کمشنر کی ہدایات پر نائب تحصیلدار جھٹ پٹ سلطان احمد نے بائی پاس کے علاقے کا اچانک دورہ کیا، مختلف دودھ فروشوں کی دکانوں کا معائنہ کیا اور موقع پر دودھ کے نرخ چیک کیے۔ دودھ فروشوں کو سختی سے ہدایت کی گئی کہ وہ حکومت کی جانب سے مقرر کردہ سرکاری نرخ 220 روپے فی لیٹر کے مطابق ہی دودھ فروخت کریں۔

نائب تحصیلدار نے واضح کیا کہ مقررہ نرخوں کی خلاف ورزی، ناجائز منافع خوری یا عوام کا استحصال کسی صورت برداشت نہیں کیا جائے گا اور خلاف ورزی کے مرتکب افراد کے خلاف سخت قانونی کارروائی کی جائے گی۔ انہوں نے کہا کہ ضلعی انتظامیہ جعفرآباد عوام کو ریلیف فراہم کرنے اور اشیائے ضروریہ کی سرکاری نرخوں پر دستیابی یقینی بنانے کے لیے تمام ممکنہ اقدامات کر رہی ہے، اور ناجائز منافع خوروں، ذخیرہ اندوزوں اور مصنوعی مہنگائی پیدا کرنے والے عناصر کے خلاف بلا امتیاز کارروائیاں جاری رہیں گی۔

ضلعی انتظامیہ نے عوام سے اپیل کی ہے کہ وہ سرکاری نرخوں سے زائد قیمت وصول کرنے والے دکانداروں کی نشاندہی کریں تاکہ ان کے خلاف فوری کارروائی کی جا سکے۔

تصویر: بشکریہ ڈی جی پی آر بلوچستان