جعفرآباد: ڈی سی خالد خان کی زیر صدارت ڈسٹرکٹ ایجوکیشن گروپ کا اجلاس، غیر حاضر اساتذہ کے خلاف کارروائی کا حکم

جعفرآباد: ڈپٹی کمشنر جعفرآباد خالد خان کی زیرِ صدارت ڈسٹرکٹ ایجوکیشن گروپ کا اجلاس منعقد ہوا، جس میں ضلع میں تعلیمی عمل کو مزید مؤثر بنانے، اساتذہ کی حاضری، غیر حاضر ملازمین کے خلاف کارروائی، تدریسی سرگرمیوں کی بہتری اور محکمہ تعلیم کو درپیش دیگر مسائل کا تفصیلی جائزہ لیا گیا۔

اجلاس میں تعلیمی اداروں میں اساتذہ اور دیگر عملے کی حاضری یقینی بنانے اور طلبہ کو بہتر تعلیمی ماحول کی فراہمی کے حوالے سے مختلف امور پر غور کیا گیا۔

ڈپٹی کمشنر خالد خان نے کہا کہ تعلیم کسی بھی معاشرے کی ترقی اور خوشحالی کی بنیاد ہے، اس لیے سرکاری اسکولوں میں اساتذہ اور عملے کی بروقت حاضری ہر صورت یقینی بنائی جائے اور فرائض میں غفلت یا مسلسل غیر حاضری کے مرتکب ملازمین کے خلاف ضابطے کے مطابق کارروائی کی جائے۔

انہوں نے کہا کہ اساتذہ کی ذمہ داری ہے کہ وہ اپنی پیشہ ورانہ ذمہ داریاں احسن انداز میں ادا کرتے ہوئے بچوں کو معیاری تعلیم دیں، جبکہ ضلعی انتظامیہ محکمہ تعلیم کے ساتھ مل کر مسائل کے حل اور تعلیمی معیار کی بہتری کے لیے ہر ممکن تعاون جاری رکھے گی۔

تصویر: بشکریہ ڈی جی پی آر بلوچستان