دکی: ڈسٹرکٹ ایکسپلوسیو کمیٹی کا اجلاس، دو کوئلہ کمپنیوں کے لائسنسوں کی تجدید کا جائزہ

دکی: ڈپٹی کمشنر دکی فضل الرحمن کبدانی کی زیرِ صدارت ڈسٹرکٹ ایکسپلوسیو کمیٹی کا اہم اجلاس منعقد ہوا، جس میں ضلع میں ایکسپلوسیو سے متعلق امور، دو کوئلہ کمپنیوں کے لائسنسوں کی تجدید، سکیورٹی معاملات اور قانونی تقاضوں کا تفصیلی جائزہ لیا گیا۔

اجلاس میں کمانڈر 87 ونگ کرنل شاہد بلال، سپرنٹنڈنٹ آف پولیس دکی یونس رضا، اسسٹنٹ کمشنر دکی محمد اکرم حریفال، اسسٹنٹ کمشنر تھل چوٹیالی عبدالسلام شاہوانی، اسسٹنٹ کمشنر لونی فتح خان بنگلزئی، متعلقہ انٹیلی جنس اداروں کے نمائندوں، انچارج سی ٹی ڈی، اسپیشل برانچ، انسپکٹر آف مائنز اور دیگر افسران نے شرکت کی۔

اجلاس میں دونوں کمپنیوں کے ایکسپلوسیو لائسنسوں کی تجدید کے کیسز پر متعلقہ محکموں کی رپورٹس، سکیورٹی کلیئرنس، قانونی تقاضوں اور حفاظتی اقدامات پر غور کیا گیا۔

قواعد کی مکمل پابندی کی ہدایت

ڈپٹی کمشنر نے ہدایت کی کہ لائسنسوں کی تجدید اور دیگر معاملات تمام قانونی و انتظامی تقاضے مکمل ہونے کے بعد ہی قواعد و ضوابط کے مطابق نمٹائے جائیں۔ انہوں نے کہا کہ ایکسپلوسیو سے متعلق معاملات میں غفلت یا غیر ضروری تاخیر قابلِ قبول نہیں، جبکہ عوام اور کان کنی کے شعبے سے وابستہ افراد کی جان و مال کا تحفظ ہر صورت یقینی بنایا جائے۔

انہوں نے ایکسپلوسیو کے استعمال، ذخیرہ اور نقل و حمل سے متعلق حفاظتی و قانونی ضوابط پر سختی سے عملدرآمد اور محکموں کے درمیان مؤثر رابطہ کاری پر زور دیا تاکہ قواعد کی خلاف ورزی کا تدارک ہو سکے۔ ان کا کہنا تھا کہ ضلع دکی میں کان کنی کے شعبے کی اہمیت کے پیش نظر محفوظ اور قانونی کان کنی کا فروغ، حفاظتی معیار کی بہتری اور قوانین پر مؤثر عملدرآمد انتظامیہ کی ترجیحات میں شامل ہے۔

اجلاس کے اختتام پر افسران کو ہدایت کی گئی کہ ایکسپلوسیو سے متعلق تمام کیسز میں قواعد و ضوابط، سکیورٹی تقاضوں اور قانونی طریقہ کار کی مکمل پابندی کرتے ہوئے رپورٹس اور ضروری کارروائی بروقت مکمل کریں۔

تصویر: بشکریہ ڈی جی پی آر بلوچستان