رکھنی میں ماڈل بازار، ٹریفک مینجمنٹ اور مین بازار سڑک کی کشادگی پر کمشنر کوہِ سلیمان کا اجلاس

بارکھان/رکھنی: وزیر اعلیٰ بلوچستان میر سرفراز بگٹی کی ہدایت پر کمشنر کوہِ سلیمان ڈویژن مجیب الرحمٰن قمبرانی کی زیرِ صدارت ماڈل بازار اور مین بازار کے منصوبوں کے حوالے سے اہم اجلاس منعقد ہوا، جس میں تعمیراتی کام کی پیش رفت، ٹریفک کی روانی اور شہریوں کے مسائل کا جائزہ لیا گیا۔

اجلاس میں پراجیکٹ ڈائریکٹر بارکھان تا رکھنی روڈ محمد ظفر کھوسہ، ایس ای سی اینڈ ڈبلیو محمد رزاق، ایکسیئن بی اینڈ آر فضل محمد زرکون، انجینئر عبدالرحمٰن کھیتران اور اسسٹنٹ کمشنر رکھنی فہد حسین عمرانی سمیت دیگر افسران نے شرکت کی۔

اجلاس میں ماڈل بازار کے تعمیراتی کام کو مقررہ تقاضوں کے مطابق آگے بڑھانے، شہر میں ٹریفک مینجمنٹ، عدالت والے روڈ کی کلیئرنس، بائی پاس سے مین روڈ تک راستہ کھولنے اور مین بازار میں سڑک کی کشادگی پر غور کیا گیا، جبکہ متعلقہ ایس ای نے ٹریفک، سڑکوں پر رکاوٹوں اور تجاوزات کے مسائل سے آگاہ کیا۔

کمشنر نے ہدایت کی کہ ٹریفک کی روانی بہتر بنانے اور آمدورفت آسان بنانے کے لیے عملی اقدامات کیے جائیں اور مذکورہ کام ترجیحی بنیادوں پر آگے بڑھائے جائیں۔ انہوں نے کہا کہ ماڈل بازار اور مین بازار کی بہتر منصوبہ بندی سے شہریوں کو سہولت ملے گی اور ٹریفک کا نظام بھی بہتر ہوگا، جبکہ محکمے باہمی رابطے کے ساتھ مسائل کے حل کے اقدامات یقینی بنائیں۔

تصویر: بشکریہ ڈی جی پی آر بلوچستان