زیارت: سرکاری ملازمین کے SAP ریکارڈ میں تاریخ پیدائش کی درستگی، ڈپٹی کمشنر عبدالقدوس اچکزئی کی زیر صدارت اجلاس

زیارت: ڈپٹی کمشنر زیارت عبدالقدوس اچکزئی کی زیرِ صدارت SAP (Systems, Applications and Products) ریکارڈ میں سرکاری ملازمین کی تاریخِ پیدائش کی درستگی و تصحیح کے حوالے سے اجلاس منعقد ہوا، جس میں سپرنٹنڈنٹ آف پولیس زیارت عبدالمالک درانی، اسسٹنٹ کمشنر زیارت حبیب الرحمن کاکڑ، ڈسٹرکٹ اکاؤنٹس آفیسر عبدالنعیم پانیزئی اور ڈپٹی ڈسٹرکٹ ایجوکیشن آفیسر نقیب اللہ کاکڑ سمیت متعلقہ افسران نے شرکت کی۔

اجلاس میں SAP ریکارڈ میں درج تاریخِ پیدائش کی درستگی، تصحیح اور اس سلسلے میں موصول درخواستوں و کیسز کا جائزہ لیا گیا اور درخواست فارموں، معاون دستاویزات اور سرکاری ریکارڈ کی جانچ پڑتال کے طریقہ کار پر غور کیا گیا۔ ڈسٹرکٹ اکاؤنٹس آفس کے کردار اور ذمہ داریوں پر بھی بات ہوئی اور اس امر پر زور دیا گیا کہ سروس ریکارڈ کو درست، مکمل اور شفاف رکھنے کے لیے تمام محکمے مربوط حکمتِ عملی کے تحت کام کریں۔

ڈپٹی کمشنر نے ہدایت کی کہ تاریخِ پیدائش سے متعلق تمام کیسز کی مکمل اور غیر جانبدارانہ جانچ پڑتال کی جائے اور دستاویزات کی باقاعدہ تصدیق کے بعد ہی قواعد کے مطابق کارروائی ہو۔ انہوں نے کہا کہ سرکاری ریکارڈ کی درستگی، شفافیت اور بروقت تصدیق مؤثر انتظامی امور کا بنیادی تقاضا ہے، اور ملازمین کے ریکارڈ کے معاملات میں میرٹ، شفافیت اور دستاویزی ثبوت کو بنیادی اہمیت دی جائے تاکہ سرکاری ریکارڈ میں کوئی غلطی، ابہام یا تضاد باقی نہ رہے۔

تصویر: بشکریہ ڈی جی پی آر بلوچستان