سوراب: ڈسٹرکٹ ہیلتھ کمیٹی کا اجلاس، غیر حاضر عملے اور عطائیوں کے خلاف کارروائی کی ہدایت

سوراب: ڈپٹی کمشنر سوراب صاحبزادہ نجیب اللہ کی ہدایت پر اسسٹنٹ کمشنر ڈاکٹر ثناءاللہ خان کی زیر صدارت ڈسٹرکٹ ہیلتھ کمیٹی کا اہم اجلاس منعقد ہوا۔

اجلاس میں ایم ایس ڈاکٹر یوسف ثانی، خزانہ افسر عبدالمالک، ڈپٹی ڈی ایچ او ڈاکٹر محمد اسماعیل، سپرنٹنڈنٹ ڈی سی آفس فضل محمد قمبرانی، ڈرگ انسپیکٹر فہد منظور، ایم اینڈ ای پی پی ایچ آئی جئیند بلوچ، پی پی ایچ آئی نمائندہ فیصل بلوچ سمیت محکمہ صحت کے افسران نے شرکت کی۔

اجلاس میں مراکز صحت کی کارکردگی، ڈاکٹرز و عملے کی حاضری اور ادویات کی دستیابی کا تفصیلی جائزہ لیا گیا۔

اسسٹنٹ کمشنر نے واضح ہدایات جاری کرتے ہوئے کہا کہ غیر حاضر عملے کے خلاف سخت محکمانہ کارروائی عمل میں لائی جائے گی، جبکہ ضلع بھر میں عطائی ڈاکٹروں اور بغیر لائسنس چلنے والے میڈیکل اسٹورز کے خلاف بلا امتیاز کارروائی کی جائے گی۔

انہوں نے کہا کہ صحت عامہ پر کوئی سمجھوتہ نہیں کیا جائے گا اور عوام کو بہترین طبی سہولیات کی فراہمی یقینی بنائی جائے گی۔

تصویر: بشکریہ ڈی جی پی آر بلوچستان