لورالائی میں صفائی مہم تیز: صدر بازار، باغی بازار اور کاکڑی مسجد روڈ پر نالیوں کی صفائی

لورالائی: چیئرمین میونسپل کمیٹی محمد طاہر ناصر اور چیف آفیسر محب اللہ بلوچ کی ہدایات پر شہر میں صفائی ستھرائی اور نکاسی آب کے نظام کو بہتر بنانے کے لیے اقدامات جاری ہیں۔ سپروائزر باران زون کی نگرانی میں صدر بازار، باغی بازار اور کاکڑی مسجد روڈ سمیت مختلف شاہراہوں اور تجارتی علاقوں میں نالیوں کی صفائی کا کام جاری ہے۔

صفائی عملے نے نالیوں میں جمع کچرا، مٹی اور دیگر رکاوٹیں نکال کر نکاسی آب کا نظام بحال کیا، تاکہ پانی کی روانی بہتر ہو اور بارش یا دیگر مواقع پر گندا پانی سڑکوں اور بازاروں میں جمع نہ ہو۔

چیئرمین میونسپل کمیٹی اور چیف آفیسر نے کہا کہ شہریوں کو صاف، صحت مند اور خوشگوار ماحول کی فراہمی میونسپل کمیٹی کی اولین ترجیح ہے اور مختلف علاقوں میں مرحلہ وار صفائی مہم جاری رہے گی۔

انہوں نے شہریوں، دکانداروں اور تاجروں سے اپیل کی کہ وہ صفائی عملے سے تعاون کریں اور کچرا نالیوں، سڑکوں اور عوامی مقامات پر پھینکنے کے بجائے مقررہ مقامات پر تلف کریں۔ حکام کے مطابق صاف ستھرا شہر ہر شہری کی مشترکہ ذمہ داری ہے۔

تصویر: بشکریہ ڈی جی پی آر بلوچستان