ڈپٹی کمشنر چمن حبیب احمد بنگلزئی سے آل اقراء پرائیویٹ سکولز آرگنائزیشن کے وفد کی ملاقات

چمن: ڈپٹی کمشنر چمن حبیب احمد بنگلزئی سے آل اقراء پرائیویٹ سکولز آرگنائزیشن ضلع چمن کے صدر ضیاء اللہ خان عابد کی قیادت میں ضلعی کابینہ کے وفد نے ملاقات کی، جس میں نجی تعلیمی اداروں کو درپیش مسائل، تعلیمی ترقی کے فروغ اور ضلعی انتظامیہ کے ساتھ باہمی تعاون مزید مؤثر بنانے پر تبادلۂ خیال کیا گیا۔

وفد نے زور دیا کہ ضلع چمن میں منعقد ہونے والے تعلیمی فیسٹیولز، سرکاری تقریبات اور دیگر اہم سرگرمیوں میں نجی تعلیمی اداروں کو بھی اہم اسٹیک ہولڈر کی حیثیت سے نمائندگی اور بھرپور شرکت کے مواقع دیے جائیں تاکہ تعلیمی سرگرمیوں کے فروغ اور طلبہ کی صلاحیتیں اجاگر کرنے کی مشترکہ کاوشیں مؤثر ہوں۔

ڈپٹی کمشنر نے وفد کے مؤقف کو سراہتے ہوئے نجی تعلیمی اداروں کے مسائل کے حل اور تعلیمی سرگرمیوں کے فروغ کے لیے ہر ممکن تعاون کی یقین دہانی کرائی۔ انہوں نے کہا کہ تعلیمی ترقی، طلبہ کی صلاحیتوں کے نکھار اور معیاری تعلیم کے فروغ کے لیے سرکاری و نجی تعلیمی اداروں کے درمیان مؤثر رابطہ کاری اور اشتراک ناگزیر ہے۔ ضلعی انتظامیہ چمن تعلیم کے فروغ، اداروں کے مابین تعاون اور طلبہ کو مثبت و تعمیری سرگرمیوں کے بہتر مواقع فراہم کرنے کے لیے پرعزم ہے۔

تصویر: بشکریہ ڈی جی پی آر بلوچستان